Latur News : सोयाबीनला प्रतिक्विंटल साडेआठ हजार रुपये हमीभाव व शेतकऱ्यांची सरसकट कर्जमाफी करावी, या मागणीसाठी गेल्या आठ दिवसांपासून छावाचे शेतकरी नेते विजयकुमार घाडगे पाटील हे बेमुदत उपोषण करीत आहेत.

त्यांच्या उपोषणाला समर्थन देऊन सरकारला जागे आणण्यासाठी सर्वपक्षीय कार्यकर्ते व शेतकऱ्यांनी बुधवारी (ता. २५) औशात रत्नागिरी-नागपूर राष्ट्रीय महामार्ग ३६१ एक तासाहून अधिक काळ रोखून धरला. तर संतप्त शेतकऱ्यांनी महामार्गावर टायर पेटवून सरकारच्या विरोधात जोरदार घोषणाबाजी केली. पोलिसांनी तत्काळ पाणी ओतून पेटलेले टायर विझविले.

दरम्यान, १८ सप्टेंबरपासून शेतकरी नेते घाडगे यांचे औशाच्या तहसील कार्यालयासमोर बेमुदत उपोषण सुरू आहे. त्यांची प्रकृती खालावली असल्याने सर्वपक्षीय नेते, कार्यकर्ते, विविध संघटना, शेतकरी संघटना व शेतकऱ्यांनी घाडगे यांना समर्थन देण्यासाठी महामार्ग रोखून धरला.

या आंदोलनात माजी आमदार दिनकर माने, राज्य बाजार समितीचे उपाध्यक्ष संतोष सोमवंशी, राजकुमार सस्तापुरे, श्रीपती काकडे, शाम भोसले, रशीद शेख, सुभाष पवार, योगीराज पाटील, विद्या पाटील, जयश्री उटगे, पप्पू कुलकर्णी, संगीता लातूरकर, सई गोरे, राजेंद्र मोरे, राजू कसबे, भगवान माकणे, अमर बिराजदार आदी उपस्थित होते. पोलिस प्रशासनाने चोख बंदोबस्त ठेवला होता.