Sindhudurg News: सिंधुदुर्ग जिल्ह्यात मॉन्सून दाखल झाल्यानंतर मुसळधार पाऊस सुरू आहे. जिल्ह्याच्या सर्व भागांत पावसाचा जोर असून नदीनाल्यांच्या पाणी पातळीत वाढ झाली आहे. 

काही ठिकाणी पडझडीचे प्रकार देखील झाले आहेत. सिंधुदुर्गात रविवारी मॉन्सून दाखल झाला. मॉन्सून दाखल होताच सकाळपासूनच जिल्ह्यात पावसाचा जोर वाढला. पावसाच्या सरीवर सरी कोसळत होत्या. 

तालुकानिहाय पाऊस :

दोडामार्ग तालुक्यात - ६६ मिमी, सावंतवाडी - ४९, वेंगुर्ला - ३९, कुडाळ - ७४, मालवण - ४३, कणकवली - ६९, देवगड - ५८ आणि वैभववाडी तालुक्यात ६८ मिमी पाऊस पडला.

रविवारी दिवसभर मुसळधार पाऊस झाला. त्यानंतर रात्रभर पाऊस कायम होता. सोमवारी (ता. २६) सकाळपासून मुसळधार पाऊस सुरू आहे. सतत पडणाऱ्या पावसामुळे जिल्ह्यातील नदीनाल्यांच्या पाणीपातळीत वाढ झाली आहे.

पावसामुळे देवगड तालुक्यातील आरे बौद्धवाडी येथे घरावर झाड कोसळून ५० हजारांचे नुकसान झाले. पावसामुळे जिल्ह्यात महावितरणची मोठी पडझड झाली आहे. आतापर्यंत ३९ लाखांचे नुकसान झाले आहे.