Sindhudurg News: जिल्ह्यात वादळीवाऱ्यासह पावसाच्या जोरदार सरी सुरू आहेत. वादळीवाऱ्यामुळे काही घरांवर झाडे कोसळून नुकसान झाले आहे. दरम्यान, कणकवली आणि वैभववाडी तालुक्याला पावसाने झोडपून काढले. जोरदार पावसामुळे या भागातील नदीनाले दुथडी भरून वाहत आहेत

जिल्हयात काल पहाटेपासून जोरदार पाऊस सुरू आहे.सकाळपासूनच पावसाच्या सरीवर सरी कोसळत होत्या.दुपारनंतर पावसाचा वाढला.कणकवली आणि वैभववाडी तालुक्याला झोडपून काढले.दोनही तालुक्यात रात्री उशिरापर्यंत मुसळधार पाऊस सुरू होता.

या पावसामुळे वैभववाडी तालुक्यातील शुक,शांती,करूळ,कुसुर,अरूणा या सर्व नद्यां दुथडी भरून वाहत होत्या.याशिवाय कणकवली तालुक्यातील गड आणि जानवली नद्यांच्या पाणपातळीत वाढ झाली होती.

कुडाळ,सावंतवाडी तालुक्यात देखील पावसाचा जोर होता. पावसामुळे काही ठिकाणी पडझडीचे प्रकार देखील झाले आहे.वेंगुर्ला तालुक्यातील मातोंड येथील नळपाणी पुरवठा योजनेची मुख्य विहीर पावसामुळे कोसळली.

या विहीरीवर मातोंड आणि सातवायगंणी गावातील २५० कुटुंबे अवलंबून आहेत.वैभववाडी तालुक्यातील एडगाव येथील एका घरावर मोठे झाड कोसळल्याने नुकसान झाले.सुदैवाने घरातील कुणालाही दुखापत झालेली नाही.

तालुकानिहाय पाऊस (मिलिमीटरमध्ये)

वैभववाडी ः ८७, कणकवली ः ८०, सावंतवाडी ः ४७, कुडाळ ः ५५, वेंगुर्ला ः २०,मालवण ः १०, देवगड ः २९, दोडामार्ग ः २९