Sindhudurg News : सिंधुदुर्ग जिल्ह्याच्या बहुतांश भागाला रविवारी (ता. २०) मुसळधार पावसाने झोडपून काढले. विजांच्या कडकडाटामुळे अनेक भागांतील वीजपुरवठा खंडित झाला होता. दरम्यान भातपिकांचे नुकसान सुरूच आहे.

जिल्ह्यात गेल्या तीन-चार दिवसांपासून वातावरण बदलले आहे. सकाळच्या सत्रात कडक उन्ह तर दुपारनंतर पाऊस असे चित्र आहे. रविवारी (ता. २०) सायकांळी उशिरा विजांच्या गडगडाटांसह जोरदार पाऊसाला सुरूवात झाली.

अनेक भागांत विजांच्या गडगडाटाने परिसर हादरून गेला. दोडामार्ग, मालवण, वैभववाडी या तालुक्यांना पावसाने झोडपून काढले. काही भागांना तासभर पावसाने झोडपून काढले.

विजांच्या कडगडाटामुळे अनेक भागांतील वीजपुरवठा खंडित झाला होता. दरम्यान, सतत पडणाऱ्या पावसामुळे भातपिकांचे नुकसान सुरूच आहे.

रविवारी (ता. २०) सकाळी अनेक शेतकऱ्यांनी भातपीक कापणी केली होती. परंतु पीक सुरक्षितस्थळी हलविताना शेतकऱ्यांची ताराबंळ उडाली. सोमवारी (ता. २१) सकाळी पावसाचे वातावरण होते. मात्र सकाळी दहानंतर कडक ऊन पडले होते.