Pune News: पुणे जिल्ह्यात अनेक ठिकाणी मॉन्सूनपूर्व पाऊस पडत आहे. शुक्रवारी (ता. ९) दुपारी तीन वाजेच्या दरम्यान पुणे शहर आणि परिसरात अनेक ठिकाणी जोरदार पाऊस झाला. जुन्नर, आंबेगाव, मावळ, मुळशी, भोर या तालुक्यांत ढगाळ वातावरण होते. तर तुरळक ठिकाणी पाऊस झाल्याने शेतकऱ्यांची चांगलीच धांदल उडाली होती.

गेल्या तीन ते चार दिवसांपासून पुणे जिल्ह्यात विविध ठिकाणी पाऊस पडत आहे. सकाळी ऊन पडत असले तरी दुपारनंतर वातावरणात वेगाने बदल होत आहे. तर काही वेळा सायंकाळनंतर वेगाने वारे वाहत आहे.

अचानक ढग भरून येत असून पाऊस पडत आहे. शुक्रवारी (ता. ९) सकाळी आठ वाजेपर्यंत निमगिरी येथे १० मिलिमीटर पाऊस पडल्याची नोंद झाली. तर माळीण येथे १ मिलिमीटर, लवासा, लव्हळे येथे एक मिलिमीटर पाऊस झाला. त्यामुळे वातावरणात गारवा वाढत असला तरी कमाल व किमान तापमानात काही प्रमाणात घट झाली आहे.

जिल्ह्यात शुक्रवारी दुपारनंतर अचानक ढगाळ वातावरण तयार होऊन वादळी वाऱ्यासह पाऊस पडला. पुणे शहरातील गुलटेकडी, पद्मावती, हडपसर, स्वारगेट अशा विविध ठिकाणी जोरदार पाऊस पडला. या पावसामुळे हवेत चांगलाच गारवा तयार झाला होता. पावसामुळे प्रवाशांची तारांबळ उडाली होती.