Akola News : खरीप हंगामात आंतरपीक म्हणून घेतल्या जाणाऱ्या तुरीच्या पिकाचे या भागात अतोनात नुकसान झाले आहे. पाऊस, धुके व आता किडीने या पिकाची वाट लावली. अकोट तालुक्यातील उमरा मंडळात २६ नोव्हेंबरपासून मॉन्सूनोतत्तर पाऊस झाला. त्यामुळे शेतांमध्ये उभे असलेले तुरीचे पीक जमिनीवर झोपले.

सोबतच वेचणीला आलेला कापूसही ओला झाल्याने मोठे नुकसान शेतकऱ्यांना सहन करावे लागत आहे. या पावसामुळे आधीच तुरीचा फुलोर गळून पडला. तुरीच्या झाडावर लागलेल्या शेंगाही तुटून पडल्या. तुरीच्या पिकासाठी हे मारक असून उत्पादनात घट येण्याची शक्यता आहे.

लिंबू फळबागांना फटका

या पावसामुळे लिंबू पिकाच्या उत्पादनावर परिणाम झाला आहे. अनेक लिंबू बागात फळांचा सडा खाली पडला आहे. सर्वच लिंबू बागाचा सध्या मशागतीचा काळ होता. तर अनेक बागा ताणावर आणि लिंबू उत्पादन सुरु असलेल्या बागा फुलोरावस्थेत होत्या.

अचानक २६ नोव्हेंबर रोजी आलेल्या पावसामुळे बागा फुटण्याच्या प्रक्रियेत अडथळा निर्माण झाला आहे. त्यामुळे लिंबू उत्पादनात भविष्यात घट दिसून येणार आहे.