Mango Production : आंबा हंगाम अंतिम टप्प्यात आला असला तरी अद्याप हपूसचे दर मात्र स्थिर राहिले आहेत. सध्या स्थानिक बाजारपेठांमध्ये हापूसची प्रतिडझन पाचशे ते सहाशे रुपयांनी विक्री केली जात आहे. आंब्याची आवकदेखील वाढली आहे.

जिल्ह्यात यावर्षी १६ नोव्हेंबरला देवगड हापूसची पहिली पेटी बाजारपेठेत दाखल झाली. त्यानंतर आठवडा-दोन आठवड्यानंतर अनेक बागायतदारांच्या बागांमधून किरकोळ प्रमाणात आंबा बाजारपेठेत आला. जानेवारी, फेब्रुवारीमध्ये आंब्याची आवक थोडीशी वाढली. परंतु खऱ्या अर्थाने मार्चमध्ये आंब्याची आवक वाढली.

एप्रिलच्या दुसऱ्या आठवड्यापासून नियमित आंबा हंगाम सुरू झाला. तेव्हापासून मोठ्या प्रमाणात आंबा राज्यासह देशभरातील विविध बाजारपेठांमध्ये पोहोचला. यावर्षी नियमित हंगाम सुरू झाला त्या वेळी देवगड हापूसचा दर प्रतिडझन ७०० ते ८०० रुपयांपर्यंत होता.

त्यामध्ये किंचित घट होऊन तो ६०० रुपयांपर्यंत आला. मात्र त्यानंतर आंब्याची आवक खूपच वाढली. त्यामुळे आंब्याचे दर कमी होतील, असे वाटत होते. मात्र देवगड हापूसचे दर स्थिरच राहिले. आता या वर्षीचा आंबा हंगाम अंतिम टप्प्यात आला आहे. अनेकदा अंतिम टप्प्यात आंब्याचे दर काही प्रमाणात कमी होतात, परंतु यावर्षी दर स्थिर राहीले आहेत.

सध्या देवगड हापूसच्या पेटीचा दर स्थानिक बाजारपेठेत २२०० ते २४०० रुपयांपर्यंत आहेत. हाच दर विविध शहरांमध्ये २५०० ते ३००० हजार रुपयांपर्यंत स्थिर राहिला आहे. आंबा हंगाम संपेपर्यंत दर स्थिर राहण्याची शक्यता आहे.

एकीकडे देवगड हापूसचे दर स्थिर असताना जिल्ह्यातील आंब्याचे दर मात्र कमी झाले आहेत. पूर्वपट्ट्यातील आंबा बाजारपेठेत आल्यामुळे सावंतवाडी, कुडाळ, कणकवली, वैभववाडी तालुक्यांत आंब्याचे दर प्रतिडझन ३०० रुपयांपर्यंत आले आहेत.