Sangli News : तासगाव तालुक्यातील मणेराजुरी, योगेवाडी, सावर्डे, यासह अन्य भागात बुधवारी (ता. २) सायंकाळी वादळी वाऱ्यासह गारपीट झाली. यामुळे सुमारे ४६० एकरावरील द्राक्ष बागांचे नुकसान झाले असल्यचा अंदाज द्राक्ष बागायतदार संघाने व्यक्त केला आहे.

द्राक्ष बागांच्या काड्या व फुटलेले कोंब मोडले. त्यामुळे शेतकऱ्यांचे नुकसान झाले असून बाधित झालेल्या बागांचे तातडीने पंचनामे करावेत, अशी मागणी द्राक्ष उत्पादक शेतकऱ्यांनी केली आहे.

सांगली जिल्ह्यात फळछाटणी सुरू आहे. गेल्या आठवड्यापासून फळ छाटणीला गती आली आहे. तासगाव तालुक्यातील कौलगे, सावर्डे, चिंचणी, मणेराजुरी, खुजगाव, वाघापूर, योगेवाडी या परिसरात द्राक्षबागांची फळछाटणी जोमात सुरू होती. सुमारे तीस टक्के बागांच्या फळछाटण्या झाल्या आहेत.

मात्र, बुधवारी (ता. २) सायंकाळी वादळी वारे, जोरदार पाऊस आणि गारपीट झाली. गारपिटीचा जोरदार तडाखा या बागांना बसला आहे. गारा पडल्याने मणेराजुरी भागातील द्राक्ष बागांच्या काड्या व फुटलेले कोंब मोडले. गारांच्या माऱ्याने पानांची चाळण झाली. तर वादळी वाऱ्यासह आलेल्या पावसाने उभी पिके जमीनदोस्त झाली.

कौलगे, सावर्डे, चिंचणी, मणेराजुरी, खुजगाव, वाघापूर, यांसह तालुक्यातील ग्रामीण भागाला पावसाने झोडपले. या गारांमुळे फळ छाटणी केलेल्या द्राक्ष बागांचे नुकसान झाले. डोळे फुगलेल्या व फुटत असलेल्या द्राक्ष बागांच्या काड्यांचे डोळे गारांच्या माराने मोडून पडले तर काही द्राक्ष बागांची पाने फाटली. यामुळे शेतकऱ्यांचे नुकसान झाले आहे. काढणीचा खरीप पाण्यात कुजत असून वाऱ्यामुळे काही ठिकाणी पिके जमीनदोस्त झाल्याचे चित्र आहे.

दरम्यान, द्राक्ष बागायतदार संघाने तासगाव तालुक्यातील विविध भागांत द्राक्षाचे नुकसान झालेल्या बागांची पाहणी केली. या वेळी या परिसरातील सुमारे ४६० एकरावरील द्राक्ष बागेला वादळी वारा, पाऊस आणि गारपिटीचा फटका बसला आहे. त्यामुळे संबंधित विभागाने बाधित झालेल्या बागांचे तातडीने पंचनामे करावेत, अशी मागणी केली आहे.