Maharashtra Weather News : पूर्वमोसमी पावसाच्या सरींची हजेरी कायम असल्याने राज्याच्या कमाल तापमानात चढ-उतार होत आहेत. आज (ता. १६) राज्यात वादळी वाऱ्यासह पावसाचा, तर नाशिक, नगर जिल्ह्यांत तुरळक ठिकाणी गारपिटीचा इशारा आहे. कोकणात उष्ण लाटेचा इशारा (येलो अलर्ट) कायम असल्याचे हवामान विभागाने म्हटले आहे.

बुधवारी (ता. १५) सकाळपर्यंतच्या २४ तासांमध्ये ब्रह्मपुरी येथे उच्चांकी ४२.२ अंश सेल्सिअस तापमानाची नोंद झाली. विदर्भ, मध्य महाराष्ट्रात काही ठिकाणी पारा ४१ अंशांच्या वर सरकला आहे. तर मराठवाडा, मध्य महाराष्ट्र आणि विदर्भात काही ठिकाणी हलक्या ते जोरदार पावसाने हजेरी लावली. ढगाळ आकाशामुळे उन्हाचा चटका कमी झाला असून, कमाल तापमानात चढ-उतार होत आहे.

दक्षिण श्रीलंकेजवळ बंगालच्या उपसागरात समुद्र सपाटीपासून ४.५ किलोमीटर उंचीपर्यंत चक्राकार वाऱ्यांची स्थिती आहे. त्यापासून लक्षद्वीप बेटांपर्यंत हवेचा कमी दाबाचा पट्टा सक्रिय आहे. तर दक्षिण कर्नाटकपासून विदर्भापर्यंत हवेचा कमी दाबाचा पट्टा तयार झाला आहे. यामुळे आगमनास पोषक हवामान होत असल्याने रविवारपर्यंत (ता. १९) अंदमान बेट समूहावर मॉन्सून दाखल होण्याची शक्यता आहे.

राज्यातही पूर्वमोसमी पावसाला (Rain) पोषक हवामान आहे. आज (ता. १६) कोकण, मध्य महाराष्ट्र, मराठवाडा, विदर्भात वादळी वाऱ्यासह पावसाची शक्यता आहे. तर नाशिक आणि नगर जिल्ह्यात गारपिटीचा इशारा (येलो अलर्ट) देण्यात आला आहे. उत्तर कोकणात उष्ण लाटेचा इशारा हवामान विभागाने आला आहे.

बुधवारी (ता. १५) सकाळपर्यंतच्या २४ तासांमध्ये नोंदले गेलेले कमाल तापमान (अंश सेल्सिअसमध्ये) :
पुणे ३७.१, धुळे ४०, जळगाव ४१.८ कोल्हापूर ३६.७, महाबळेश्‍वर ३०.१, मालेगाव ४०.१, नाशिक ३७.८, निफाड ३७.६, सांगली ३७.१, सातारा ३८.२, सोलापूर ३९.५, सांताक्रूझ ३६.८, डहाणू ३६, रत्नागिरी ३६.२, छत्रपती संभाजीनगर ३८.३, बीड ४०.९, नांदेड ३८.६, धाराशिव ३८.६, परभणी ३९.१, अकोला ४१.८, अमरावती ४०.६, बुलडाणा ३९, ब्रह्मपुरी ४२.२, चंद्रपूर ४१.४, गडचिरोली ३९.६, गोंदिया ३९.२, नागपूर ३८.९, वर्धा ४०, वाशीम ४१.२, यवतमाळ ४१.७.

उष्ण लाटेचा इशारा (येलो अलर्ट) :
पालघर, ठाणे, मुंबई, रायगड.

वादळी पाऊस, गारपिटीचा इशारा (येलो अलर्ट) :
नगर, नाशिक.

वादळी पावसाचा इशारा (येलो अलर्ट) :
रत्नागिरी, सिंधुदुर्ग, धुळे, जळगाव, पुणे, सातारा, सांगली, सोलापूर, कोल्हापूर, छत्रपती संभाजीनगर, जालना, बीड, धाराशिव, लातूर, हिंगोली, अकोला, अमरावती, यवतमाळ, नागपूर, चंद्रपूर, गोंदिया, गडचिरोली.