Parbhani News : परभणी ः किमान आधारभूत किंमत दराने (प्रतिक्विंटल ४८९२ रुपये) परभणी, हिंगोली जिल्ह्यतील ४ केंद्रांवर गुरुवारपर्यंत (ता. २४) ६१ शेतकऱ्यांचे ९२३.४८ क्विंटल सोयाबीन खरेदी करण्यात आले. दरम्यान, या जिल्ह्यांतील १८ खरेदी केंद्रांवर ८ हजार ५४६ शेतकऱ्यांनी हमीभावाने सोयाबीन विक्रीसाठी नोंदणी केली, अशी माहिती पणन महासंघाच्या सूत्रांनी दिली. केंद्र सरकारच्या किमान आधारभूत किंमत खरेदी योजनेअंतर्गत यंदा परभणी जिल्ह्यात राज्य सहकरी पणन महासंघ व केंद्रिय नोडल एजन्सी राष्ट्रीय कृषी सहकारी पणन महासंघ (नाफेड) यांच्यातर्फे मंगळवारपासून (ता. १५) सोयाबीन खरेदी केली जात आहे.

जिल्ह्यात परभणी, पेडगाव, जिंतूर, बोरी, सेलू, मानवत, पाथरी, सोनपेठ, पूर्णा या ९ ठिकाणी खरेदी केंद्रांवर सोयाबीन विक्रीसाठी गुरुवारअखेर (ता. २४) ५ हजार ५९३ शेतकऱ्यांनी नोंदणी केली. त्यापैकी परभणी, मानवत, पाथरी, पूर्णा, बोरी येथील खरेदी केंद्रांवर सोयाबीन घेऊन येण्यासाठी नोंदणीकृत ३७४ शेतकऱ्यांना एसएमएस पाठविण्यात आले. परभणी आणि पूर्णा या दोन खरेदी केंद्रांवर ४५ शेतकऱ्यांचे ७०६.९८ क्विंटल सोयाबीन खरेदी करण्यात आले.

हिंगोली जिल्ह्यात राज्य सहकारी पणन महासंघ व केंद्रिय नोडल एजन्सी राष्ट्रीय सहकारी ग्राहक महासंघ (एनसीसीएफ) यांच्यातर्फे हमीभावाने सोयाबीन, मूग, उडीद खरेदी करण्यात येणार आहे. जिल्ह्यात हिंगोली, कन्हेरगाव, कळमनुरी, वारंगा, वसमत, जवळा बाजार, येळेगाव, सेनगाव, साखरा या ९ खरेदी केंद्रांवर सोयाबीन खरेदी सुरू करण्यात आली आहे. या केंद्रांवर सोयाबीन विक्रीसाठी गुरुवारपर्यंत (ता. २४) २ हजार ९५३ शेतकऱ्यांनी नोंदणी केली आहे. त्यापैकी कळमनुरी, वारंगा, वसमत, जवळा बाजार, येळेगाव, साखरा या केंद्रांवर सोयाबीन विक्रीसाठी आणण्यासाठी ५५६ शेतकऱ्यांना एसएमएस पाठविण्यात आले. कळमनुरी आणि वारंगा या २ केंद्रांवर १६ शेतकऱ्यांचे २१६.५० क्विंटल सोयाबीन खरेदी करण्यात आले.