Parbhani News : विहिरी, विंधन विहिरीतून पाण्याचा बेसुमार उपसा सुरू आहे. परिणामी, जिल्ह्यातील भूजल पातळी यंदाच्या जानेवारी महिन्यात ६.२७ मीटर खोल गेली आहे. भूजल सर्व्हक्षण व विकास यंत्रणेनेकडून घेण्यात आलेल्या निरीक्षण विहिरीतील नोंदीवरून हे स्पष्ट झाले आहे.

सहा तालुक्यातील भूजल पातळीत सरासरीहून अधिक घट झाली आहे. २०२४ मधील ऑक्टोबरच्या तुलनेत भूजल पातळी सरासरी २.०७ मीटरने, तर पाच वर्षातील सरासरीच्या तुलनेत ०.४९ मीटरने खोल गेली आहे. उन्हाळ्यात पाणीटंचाईचे संकट अधिक गहिरे होऊ शकते.

भूजल सर्व्हेक्षण व विकास यंत्रणेच्या वरिष्ठ भू वैज्ञानिक कार्यालयांतर्गत जिल्ह्यातील ९ तालुक्यांतील ८६ निरीक्षण विहिरीतील भूजल पातळीच्या नोंदी घेतल्या जातात. जिल्ह्यात २०२४ च्या जून ते सप्टेंबर या (मॉन्सून कालावधी) चार महिन्यांत सरासरी ७६१.३ मिलिमीटर पाऊस अपेक्षित असतांना प्रत्यक्षात ८२७.३ मिलिमीटर (१०८.७ टक्के) पाऊस झाला.

सप्टेंबर महिन्यात २६७.९ मिलिमीटर (१५८.५ टक्के) पाऊस झाला. त्यामुळे भूगर्भात पाणी मुरण्याच्या प्रमाणात वाढ झाली. ऑक्टोबर महिन्यात जिल्ह्यातील भूजल पातळी सरासरी ४.२० मीटर असल्याचे आढळून आले होते. सततच्या उपशामुळे यंदा अनेक भागांतील विहिरींचे पाणी जानेवारी महिन्यातच विहिरीचे तळ दिसू लागले.

जानेवारी महिन्यात घेण्यात आलेल्या निरीक्षण विहिरीतील नोंदीनुसार जिल्ह्यातील सरासरी भूजल पातळी ६.२७ मीटर खोल असल्याचे आढळून आले आहे. २०२० ते २०२४ या पाच वर्षातील सरासरी भूजल पातळीच्या तुलनेत यंदाच्या जानेवारी महिन्यात परभणी, मानवत, पाथरी, सोनपेठ, गंगाखेड, पालम या सहा तालुक्यांतील पातळी खोल गेली आहे. फेब्रुवारी महिन्यात तापमानात वाढ झाल्यामुळे पिकांना पाण्याची गरज वाढली. उपसा सुरूच असल्यामुळे भूजल पातळी खोल जात आहे.

परभणी जिल्हा भूजल पातळी स्थिती (मीटरमध्ये)

तालुका निरीक्षण विहिरी सरासरी भूजल पातळी जानेवारी भूजल पातळी फरक

परभणी १४ ६.१३ ६.९६ उणे ०.७२

जिंतूर २० ५.६५ ५.६२ अधिक ०.०३

सेलू १२ ८.२५ ७.२९ अधिक ०.९६

मानवत ४ ५.०७ ५.७० उणे ०.६३

पाथरी ८ ६.१७ ७.१८ उणे १.०१

सोनपेठ ५ ५.८० ७.६८ उणे १.८८

गंगाखेड ९ ६.८६ ७.७० उणे०.८४

पालम ७ ४.३८ ५.११ उणे ०.७३

पूर्णा ७ ३.७६ ३.३७ अधिक ०.४९