Solapur News : द्राक्ष उत्पादकांसाठी बागायतदार संघाने अत्याधुनिक प्रयोगशाळा उभारली आहे, या प्रयोगशाळेचा उपयोग द्राक्ष उत्पादकांनी करून आपल्या द्राक्षाची गुणवत्ता वाढवावी, असे आवाहन द्राक्ष बागायतदार संघाचे अध्यक्ष राजेंद्र देशमुख यांनी केले.

महाराष्ट्र राज्य द्राक्ष बागायतदार संघाच्या सोलापूर विभाग अध्यक्षपदी बार्शीचे राजेंद्र देशमुख आणि मानद सचिवपदी शंकर येणगुरे (कासेगाव) यांची बिनविरोध निवड झाली आहे, या पदाधिकाऱ्यांचा सत्कार द्राक्ष संघाचे राज्य खजिनदार शिवाजीराव पवार, ज्येष्ठ मार्गदर्शक महादेव चाकोते यांच्या हस्ते करण्यात आला.

त्या वेळी सत्काराला उत्तर देताना श्री. देशमुख बोलत होते. या वेळी मावळते अध्यक्ष प्रशांत देशमुख, गौसअहमद शेख उपस्थित होते. श्री. देशमुख म्हणाले, संघाने आता अलीकडेच अत्याधुनिक अशी प्रयोगशाळा उभारली आहे,

द्राक्षासाठी माती, पाणी परीक्षणासह देठ परीक्षणाची सुविधा इथे आहे. द्राक्ष उत्पादकांनी त्याचा पुरेपूर उपयोग करून घेतला पाहिजे, द्राक्षाची गुणवत्ता अधिकाधिक कशी वाढवता येईल, यावर भर दिला पाहिजे.

त्याशिवाय दर्जेदार खते आणि सूक्ष्मअन्नद्रव्ये पुरवण्याचा आमचा प्रयत्न आहे, असेही ते म्हणाले. या वेळी संघाचे खजिनदार पवार आणि ज्येष्ठ संचालक चाकोते यांनी नव्या पदाधिकाऱ्यांना शुभेच्छा देताना, संघाकडून शेतकऱ्यांना अधिकाधिक सहकार्य आणि मदतीची अपेक्षा व्यक्त केली.