Yavatmal News : घरकुलासाठी जागा नाही, घरकुल कसे बांधावे? या प्रश्‍नावर खासदार संजय देशमुख यांच्या प्रयत्नानंतर आता यवतमाळ मुख्य कार्यकारी अधिकारी यांनी तोडगा काढला आहे. अशा लाभार्थ्यांना शेतातही घरकुल बांधता येणार आहे.

खासदार संजय देशमुख यांनी नुकतीच केंद्रीय मंत्री शिवराजसिंह चव्हाण यांची दिल्ली येथे भेट घेऊन त्यांना यवतमाळ, वाशीम जिल्ह्यातील पंतप्रधान घरकुल आवास योजनेबाबत चर्चा करून निवेदन दिले. यवतमाळ जिल्ह्याकरिता ५० हजार ८३२, तर वाशीम जिल्ह्यातील १५ हजार २४० घरकुल मंजूर करून घेतले.

खासदार देशमुख यांनी २९ जानेवारी रोजी पुसद येथे उपविभागीय कार्यालयांतर्गत शासकीय अधिकारी व नागरिकांची आढावा बैठक घेतली. यामध्ये बहुतांश तक्रारी घरकुल लाभार्थ्यांच्या होत्या. घरकुलसाठी स्वतःची जागा नसणे, शासकीय जागेवर राहणे, त्यामुळे नमुना ‘ड’ न मिळणे, तलाठ्याचे प्रमाणपत्र न मिळणे, ग्रामपंचायतीत नोंदणी नसणे अशा तक्रारी आल्या.

यावर खासदार संजय देशमुख यांनी उपविभागीय अधिकारी आशिष बिजवल यांना या समस्यांचे तत्काळ निवारण करण्याचे निर्देश दिले. पुसद येथे उपविभागीय अधिकारी आशिष बिजवल यांनी ३० जानेवारी रोजी ग्रामसेवक, तलाठी व घरकुल संबंधातील अधिकारी कर्मचाऱ्यांची बैठक घेतली.

त्यानंतर जिल्हाधिकारी, मुख्य कार्यकारी अधिकारी यांच्याशी संपर्क करून या संबंधात माहिती देण्यात आली. जिल्हा परिषद मुख्य कार्यकारी अधिकाऱ्यांनी दखल घेऊन जागे संदर्भातील समस्या सोडविण्यासाठी जलद गतीने काम मार्गी लावले. ज्यांच्याकडे शेती आहे, परंतु घरकुलासाठी जागा नाही अशा व्यक्तींना आता स्वतःच्या शेतामध्ये घरकुल बांधता येईल, असे आदेश पारित केले.