Kolhapur Jilha Dudh Sangh : ‘कोल्हापूर जिल्हा सहकारी दूध उत्पादक (गोकुळ) संघाला दूध पुरवठा करणाऱ्या दूध संस्थांकडून चांगला दूध पुरवठा होतो. काही दूध संस्थांकडून भेसळयुक्त दूध पुरवठा होत असेल तर तो होऊ दिला जाणार नाही. शेतकऱ्यांच्या चांगल्या दुधाला जास्त दर देण्याची जबाबदारी जशी आहे, तशीच ग्राहकांना सकस आणि चांगले दूध विक्री करण्याची जबाबदारीही गोकुळची आहे. चुकीच्या पद्धतीने दूध पुरवठा करणारी दूध संस्था कोणाचीही असो असा दूध पुरवठा तत्काळ थांबवला जाईल’, अशी माहिती ‘गोकुळ’चे अध्यक्ष अरुण डोंगळे यांनी प्रसिद्धीपत्रकाद्वारे आज (ता.०५) दिली.

अध्यक्ष डोंगळे म्हणाले, ‘गोकुळला हजारो संस्था दूध पुरवठा करतात. काही संस्थांमध्ये किरकोळ भेसळयुक्त दूध निघत असेल तर ते बाजूला काढले जाते. ते दूध कोणाच्या संस्थेचे आहे, कोणाच्या नावाने आहे, हे पाहिले जात नाही. जे दूध गोकुळला येते ते दूध संस्थेच्या नावाने नाही तर बारकोडने येत असते.

त्यामुळे मशिनमध्ये याची तपासणी झाल्यानंतर दुधाची गुणवत्ता लक्षात येते. भविष्यातही भेसळसदृश किंवा भेसळयुक्त दूध नाकारले जाईल. त्यामुळे दूध संस्थांनीही आपला संघ म्हणून चांगला दूध पुरवठा करावा, अशी माफक अपेक्षा आहे.

जिल्ह्यात अनेक दूध संस्थांना काही नेत्यांची नावे दिली आहेत. यात चुकीचे काहीही नाही. दरम्यान, ज्या नेत्यांची नावे आहेत, ते नेते कधीही दुधात भेसळ करा म्हणून सांगणार नाहीत. चांगला दूध पुरवठा करून संघाचा नावलौकिक वाढवला पाहिजे, अशी त्या सर्व नेत्यांची भूमिका होती. हे विसरून चालणार नाही.’