Jalgaon News : जिल्ह्यासाठी अतिशय महत्त्वाच्या गिरणा धरणाच्या जलसाठ्यात चांगली किंवा आश्वासक वाढ झाली आहे. पश्चिम भागासह धरणाच्या लाभक्षेत्रात चांगला पाऊस झाल्याने धरणातील जलसाठा २८ टक्क्यांपर्यंत पोहोचला आहे.

गिरणा धरणातील जलसाठा मेच्या सुरुवातीपर्यंत सुमारे २० टक्के एवढाच होता. गिरणा धरण भौगोलिकदृष्ट्या नाशिक जिल्ह्यातील नांदगाव तालुक्यात आहे. परंतु त्याचा सर्वाधिक लाभ जळगाव जिल्ह्यास आहे. नाशिकमधील मालेगावला त्यातून पाणी मिळते. जळगाव जिल्ह्यातील चाळीसगाव, पाचोरा, भडगाव, एरंडोल, धरणगावातील सुमारे २१ हजार हेक्टर क्षेत्रास गिरणा धरणातून पाणी दिले जाते.

तसेच पाचोरा, चाळीसगाव व भडगाव शहरासह अनेक गावांना पिण्यासाठीदेखील या धरणातून पाणी मिळते. गिरणा नदीत नदीकाठची टंचाई दूर करण्यासह सार्वजनिक पाणी योजनांचे स्रोत मजबूत करण्यासाठी या धरणातून दरवर्षी पाच वेळेस नदीत आवर्तन सोडले जाते. हे आवर्तन कानळदापर्यंत (ता. जळगाव) म्हणजेच नदीच्या शेवटच्या टप्प्यापर्यंत येते. यंदाही अखेरचे आवर्तन मे मध्ये सोडण्यात आले होते.

गिरणा धरण २०२४ मध्ये १०० टक्के भरले होते. चांगला पाऊस सप्टेंबरअखेर झाल्याने नदीत नोव्हेंबरपर्यंत प्रवाही पाणी होते. तसेच पावसामुळे पाण्याचा उपयोग ऑक्टोबरपर्यंत करण्याची वेळ आली नव्हती. कारण पिकांसाठी पुरेसा ओलावा, वाफसा होता. यंदा पाऊस कमी आहे.

जळगाव जिल्ह्यात जूनमध्ये पावसाची तूट दिसत आहे. मागील वर्षी जूनअखेरपर्यंत जिल्ह्यात १३३ मिलिमीटर पाऊस झाला. जूनमध्ये जिल्ह्यात एकूण सुमारे १२२ मिलिमीटर पाऊस अपेक्षित असतो. पण पाऊसमान कमी असल्याने जिल्ह्यात एकूण पाऊस सुमारे ७५ मिलिमीटर आहे. हा महिना संपण्यास चार दिवस राहिले आहेत. पुढील चार दिवसांत जोरदार पाऊस न आल्यास अडचणी वाढतील, असेही दिसत आहे.

यात अनेक सिंचन प्रकल्पांतील जलसाठा अल्प आहे. गिरणा पट्ट्यातील अग्नावती, मन्याड प्रकल्पांत जलसाठा घटला आहे. गिरणा धरणात सुमारे २० टक्के जलसाठा होता. परंतु धरणाचे लाभक्षेत्र नाशिक, गुजरातमधील सापुतारा भागात आहे.

या भागात जोरदार पाऊस झाल्याने गिरणा धरणात जलसाठा वाढला आहे. सुमारे १८ ते २० दिवसांतच त्यातील जलसाठा २८ टक्के झाला आहे. गिरणा धरणाची एकूण साठवण क्षमता १८ टीएमसी आहे. त्यातील जलसाठा वाढल्याने दिलासा मिळाला आहे.