Bhuvneshwar News : ओडिशामधील लांजिया सौरा चित्रशैली, डोंगरिया कोंध नक्षीदार शाल आणि खजूर गूळ यांसह ओडिशामधील सात उत्पादनांना भौगोलिक मानांकन (जीआय) मिळाले असल्याची माहिती ओडिशा सरकारच्या राज्य अनुसूचित जाती-जमाती, अल्पसंख्याक आणि मागासवर्गीय कल्याण विभागाच्या वतीने गुरुवारी (ता. ४) देण्यात आली.

ओडिशातील उत्पादनांना नुकत्याच मिळालेल्या मानांकनासह राज्यातील उत्पादनांना मिळालेल्या ‘जीआय’ची संख्या आता २५ झाली आहे.

या उत्पादनांना ‘जीआय’

ढेंकनाल मगजी हा खाद्यपदार्थ, मयूरभंज येथील काई चटणी, नयागड कांतेमुडी वांगी, कलाजीरा तांदूळ, या उत्पादनांनाही जीआय मानांकन देण्यात आले आहे. लांजिया सौरा ही ओडिशामधील राजगड जिल्ह्यातील ‘पीव्हीटीजी’ आदिवासी समुदायाची खास चित्रशैली आहे.

हा समुदाय प्रामुख्याने त्यांच्या घरांच्या भिंतींवर लाल रंगा आणि पांढऱ्या रंगात ही चित्रे साकारली जातात. त्याचप्रमाणे डोंगरिया कोंध या आदिवासी समाजाच्या महिला खास नक्षी असलेल्या शालींची निर्मिती करतात, येथे आलेल्या पाहुण्यांना या शाली भेट देण्याची पद्धत आहे.

जीआय मानांकन मिळालेला कलाजीरा तांदूळ हा औषधी गुणधर्मांनी युक्त आहे, अशी स्थानिकांची मान्यता आहे. ओडिशात आढळणाऱ्या लाल मुंग्यांपासून तयार करण्यात येणारी काई चटणी ही देखील आरोग्यासाठी चांगली असल्याचा स्थानिकांच्या वतीने दावा करण्यात येतो.

त्याचप्रमाणे जीआय मानांकन मिळालेला खजूर गूळ हा येथील गजपती जिल्ह्यात तयार केला जातो. खजुराच्या झाडापासून या गुळाची निर्मिती केली जाते.