Kolhapur News : शासनाने परवानगी दिल्यास तातडीने प्रतिटन शंभर रुपये अधिक देण्यास आम्ही तयार आहोत. चालूवर्षी १५ ते १६ लाख टन उसाचे गाळप करण्याचे नियोजन करण्यात आले आहे. शासनाच्या धोरणानुसार चालू गळीत हंगामात एफआरपीची एकरकमी रक्कम देण्यात येणार आहे.

दत्तने नेहमीच सभासदांचे हित जोपासले आहे, असे प्रतिपादन श्री दत्त उद्योग समूहाचे प्रमुख गणपतराव पाटील यांनी केले. शिरोळ येथील श्री दत्त शेतकरी सहकारी साखर कारखान्याची ५५ वी वार्षिक सर्वसाधारण सभा कारखान्याच्या कार्यस्थळावर झाली. त्याप्रसंगी श्री. पाटील बोलत होते.

कार्यकारी संचालक एम. व्ही. पाटील यांनी विषय पत्रिकेचे वाचन केले. सभासदांनी सर्वच विषयांना हात उंचावून मंजुरी दिली. अध्यक्षस्थानी कारखान्याचे चेअरमन रघुनाथ पाटील होते.

या वेळी उत्तम पाटील-बोरगावकर, पृथ्वीराज यादव, व्हाइस चेअरमन शरदचंद्र फाटक, संचालक अनिलराव यादव, इंद्रजीत पाटील, अ‍ॅड. प्रमोद पाटील, विनया घोरपडे, अस्मिता पाटील यांच्यासह सर्व संचालक सचिव अशोक शिंदे, मुख्य शेती अधिकारी श्रीशैल हेगाना, यांच्यासह सर्व अधिकारी सभासद मोठ्या संख्येने उपस्थित होते.

शिरोळ दत्त कारखान्याच्या प्रवेशद्वारावर आंदोलन अंकुशचे प्रमुख धनाजी चुडमुंगे, दीपक पाटील यांच्यासह कार्यकर्ते विविध मागण्यांसाठी घोषणाबाजी करत थांबले होते. शिवाय भरसभेत चालूवर्षी ४ हजार रुपये प्रतिटन दर द्यावा, यासह विविध मागण्या त्यांनी मांडल्या.