Hingoli News : मराठवाड्यातील पडलेल्या पावसाच्या खंडामुळे पाण्याचे संकट निर्माण झाले आहे. तर हिंगोली जिल्ह्यातील काही भागात अतिवृष्टी झाल्याने शेतकरी अडचणीत आहेत. अशा परिस्थिती शेतकरी पीक विम्याची आशा लागून राहिली आहे. पिक विमा कंपनीच्या विरोधात हिंगोलीत फसवणुकीचा गुन्हा दाखल करण्यात आला आहे.

महाराष्ट्रातील अनेक जिल्ह्यांमध्ये पावसाचा मोठा खंड असल्यामुळे खरीप पिके अडचणीत आली आहेत. तर नांदेड व हिंगोली या दोन जिल्ह्यांमध्ये झालेल्या अतिवृष्टीमुळे शेतकरी संकटात सापडले आहेत. त्यांना दिलासा देण्यासाठी सर्व मंडळांमध्ये तत्काळ पंचनामे सुरू करावेत, असे निर्देश कृषिमंत्री धनंजय मुंडे यांनी प्रशासनास दिले.

त्यानंतर कृषी विभाग आणि पीक विमा कंपन्यांकडून पंचनाम्याचे काम सुरू आहे. शासनाकडून शेतकऱ्यांना अग्रीम नुकसान भरपाई देणार असल्याचे सांगितले आहे. परंतु, पीक विमा कंपन्यांनी जिल्हाधिकाऱ्यांच्या प्रस्तावावर आक्षेप नोंदवला आहे. अशा परिस्थितीमध्ये पिक विमा उतरवणाऱ्या आयसीआयसीआय लोंगबार्ड या पीकविमा कंपनीच्या विरोधात हिंगोली मध्ये शेतकऱ्यांची फसवणूक केल्याप्रकरणी गुन्हा दाखल करण्यात आला आहे.

कृषी विभागाने दिलेल्या तक्रारीत म्हटले आहे की, आयसीआयसीआय या कंपनीच्या पर्यवेक्षकांनी शेतकऱ्यांच्या शेतात पंचनामे करताना स्वतःच परस्पर स्वाक्षऱ्या केल्या. शेतकऱ्यांच्या तक्रारीनंतर कृषी विभागाच्या वतीने चौकशी केल्यानंतर खोट्या सह्या करण्यात आल्याचे निष्पन्न झाले. त्या नंतर आता कृषी विभागातील अधिकाऱ्यांनी तक्रार दाखल करत गुन्हा दाखल केला आहे. याप्रकरणी अधिक तपास वरिष्ठ पोलीस निरीक्षक नरेंद्र पडळकर करत आहेत.