Kolhapur News : तीन तालुक्यांतील ५४ गावांना सुजलाम्‌ सुफलाम्‌ करणाऱ्या कुंभी मध्यम प्रकल्पात ५३ टक्के पाणीसाठा शिल्‍लक आहे. तो गतवर्षीच्या तुलनेत आठ टक्क्यांनी कमी आहे. अणदूर, कोदे व वेसरफ या तीन लघुप्रकल्पांतही पुरेसा पाणीसाठा शिल्‍लक आहे. तालुक्यातील पाटबंधारे प्रकल्पामध्ये शिल्‍लक असलेला पाणीसाठा १५ जून अखेर सिंचनासाठी पुरेल, असे नियोजन पाटबंधारे विभागाने केले आहे.

गगनबावड्यात कुंभी हा मध्‍यम तर कोदे, अणदूर, वेसरफ हे लघू असे एकूण चार पाटबंधारे प्रकल्‍प आहेत. दरवर्षी हे चारही प्रकल्प पूर्ण क्षमतेने भरतात. गगनबावड्यासह पन्‍हाळा व करवीर या तीन तालुक्ं‍यातील सुमारे ५४ गावांतील ८७११ हेक्टरमधील पिके सिंचनासाठी कुंभी मध्यम प्रकल्पावर अवलंबून आहेत.

या प्रकल्पातील पाणी कुंभी नदीत सोडले जाते. बॅक वॉटर पद्धतीने कळे बंधाऱ्यातून या प्रकल्पाचे पाणी धामणी नदीत सोडावे लागते. चालू वर्षी पाऊस लवकर परतल्याने पाण्याचे आवर्तन लवकर सुरू झाले. चालू उन्हाळ्यामध्ये म्हणावा तसा वळीव पाऊस बरसला नाही. प्रकल्पातील पाण्याचा जादा वापर झाला असल्या कारणाने गतवर्षीपेक्षा कुंभी प्रकल्पातील पाणीसाठा आठ टक्क्यांनी कमी आहे.

अणदूर लघुप्रकल्पात ४७ टक्के पाणीसाठा शिल्लक असून तो गत वर्षीच्या तुलनेत पाच टक्क्यांनी कमी आहे. वेसरफ लघुप्रकल्पात २७ टक्के साठा शिल्लक असून तो गत वर्षीच्या तुलनेत १५ टक्क्यांनी कमी आहे. कोदे लघुप्रकल्पात ३८ टक्के साठा असून तो गतवर्षीच्या तुलनेत आठ टक्के जादा आहे. सध्याचा साठा कुंभी, सरस्‍वती व रूपणी नदीकाठावरच्‍या गावांना १५ जून अखेर पुरविण्याचे नियोजन पाटबंधारे विभागाने केले आहे.