Nagpur News : रोजगार हमी योजनेतून गायरान जमिनीवर चारा लागवडीसंदर्भाने शासन परिपत्रक आहे. त्याचाच आधार घेत (कै.) वसंतराव नाईक शेती स्वावलंबन मिशनच्या माध्यमातून आत्महत्याग्रस्त जिल्ह्यांमध्ये चारा लागवडीला प्रोत्साहन दिले जात आहे. पहिल्या टप्प्यात सुमारे सहाशे एकरावर चारालागवडीचे उद्दिष्ट निश्चित करण्यात आले आहे.

विदर्भासह मराठवाड्यातील आत्महत्या नियंत्रणाच्या उद्देशाने शासनाकडून (कै.) वसंतराव नाईक शेती स्वावलंबन मिशनची अंमलबजावणी केली जात आहे. ॲड. नीलेश हेलोंडे पाटील हे सध्या या मिशनचे अध्यक्ष आहेत. दरम्यान शेतीपूरक दुग्ध व्यवसायातून शेतकऱ्यांच्या जीवनात संपन्नता येऊ शकते.

या जाणीवेतून मिशनमधून पशुपालनाकरिता शेतकऱ्यांना प्रोत्साहित केले जात आहे. मात्र हा व्यवसाय करणाऱ्या शेतकऱ्यांना चाऱ्याची गरज भासणार आहे. त्याकरिता गावांत उपलब्ध गायरान जमिनीचा विनियोग करण्याच्या सूचना मिशनमधून देण्यात आल्या आहेत.

शासनाच्या ७ जून रोजीच्या परित्रकाचा याकामी उपयोग घेण्याचे निर्देश देण्यात आले आहेत. यंदा विदर्भात गायरान जमिनीवर सुमारे ६०० एकरावर चारा लागवड प्रस्तावित आहे. त्यानुसार कामाला सुरुवात झाली असून २०० एकरापेक्षा अधिक गायरान जमिनीवर आतापर्यंत लागवड झाली आहे.

वन विभाग, पशुसंवर्धन, रोजगार हमी योजनेच्या सहकार्यातून यवतमाळ जिल्ह्यात १७० एकरावर चारा लागवडीचे उद्दिष्ट आहे. त्यापैकी १०० एकरावर लागवड झाली आहे. पशुधन विकास अधिकारी तांत्रिक तर महसूलकडून प्रशासकीय मान्यता दिली जाते. त्याआधारे मजुरांचे मस्टर तयार करून चारालागवड होते. यवतमाळ जिल्हाधिकारी डॉ. पंकज आशिया या उपक्रमासाठी फार आग्रही आहेत. यवतमळ जिल्ह्यात ९३९ हेक्‍टर जमीन उपलब्ध आहे. - डॉ. विजय राहाटे, जिल्हा उपायुक्‍त पशुसंवर्धन, यवतमाळ.