Yavatmal News : शेती क्षेत्रात उत्पादकता वाढली तरच उत्पन्न वाढणार आहे ही बाब विचारात घेता शेतकऱ्यांनी आपल्यास्तरावर निवड पद्धतीने का होईना नव्या उत्पादनक्षम वाणाच्या वापरावर भर देण्याची गरज असल्याचे मत महागाव तालुका कृषी अधिकारी सुधाकर धुळधुळे यांनी व्यक्‍त केले.

उटी येथील विनोद मैंद या शेतकऱ्याने गेल्या काही वर्षात निवड पद्धतीने अनेक वाण विकसित करण्यावर भर दिला आहे. आजवर त्यांनी निवड पद्धतीने चार वाणावर काम केले. या वेळी त्यांनी हरभऱ्याचे नाव वाण निवड पद्धतीने विकसित केले आहे. एनडब्ल्युआरडी-४८ असे त्याचे नामकरण करण्यात आले आहे.

मैंद यांनी त्यांच्या साडेपाच एकर क्षेत्रात हे वाण लावले आहे. या वाणाच्या पाहणीनंतर श्री. धुळधुळे बोलत होते. मंडळ कृषी अधिकारी भारत केचे, राजेंद्र फाळके, कृषी सहायक मुकुंद लोणीकर, ग्रामसेवक तिरुपती केंद्रे, यांची या वेळी उपस्थिती होती.

धुळधुळे म्हणाले, की शेतीमालाची उत्पादकता वाढावी याकरीता शेतकरी मैंद हे सातत्याने प्रयत्नशील असतात. त्यांची प्रयोगशीलता अनुकरणीय असल्याचेही त्यांनी सांगितले. हरभरा पिकाची पाहणी करण्याबरोबरच या वेळी अधिकाऱ्यांनी पीक वाढीच्या अनुषंगाने विविध नोंदीही घेतल्या.

...असे आहे लागवड अंतर

हरभरा लागवडीसाठी दोन ओळीत तीन फूट तर दोन झाडांतील अंतर चार इंच ठेवण्यात आले आहे. ट्रॅक्‍टरच्या सहाय्याने पेरणी केली. आता हे पीक बहरात असून एका झाडाला ४८ पेक्षा अधिक फांद्या आणि त्यालाही उपफांद्या असल्याचा दावा विनोद मैंद यांनी केला आहे. गेल्या हंगामात या वाणापासून एकरी २२ क्‍विंटलची उत्पादकता मिळाल्याचे त्यांनी सांगितले. एकरी वीस किलो बियाणे वापर यामध्ये केला जातो.