Beed News : तालुक्यामध्ये खरिप हंगामात पेरणी केलेल्या सोयाबीन काढणीस आले आहे तर कपाशी देखिल फुटण्यास सुरवात झाली आहे. परंतु सप्टेंबर महिन्यात लावलेल्या पावसाने हजेरीमुळे सुमारे ५८ हजार हेक्टरवरील कपाशी, सोयाबीनचे पिकाला फटका बसला असून याचा उत्पन्नावर परिणाम झाला आहे.

तालुक्यामध्ये जून महिन्यात खरीप हंगामात कापूस, सोयाबीन, तूर, उडीद, मूग, बाजरी आदी खरिप पिकांची ६० हजार ३३२ हेक्टरवर शेतकऱ्यांनी लागवड केलेली आहे. उडीद, मुगाची काढणी झालेली असून सध्या सोयाबीनचे पिकाची काढणी सुरू आहे तर कपाशीचे देखील बोंडे फुटत आहेत.

अशा परिस्थितीत परतीचा पाऊस बरसत असल्याने अनेक शेतकऱ्यांनी काढून ठेवलेले सोयाबीन पूर्णतः पाण्यात जात आहे तर कपाशीचे फुटलेले पांढरे सोने काळवंडत असल्याची परिस्थितीत सध्या निर्माण झाली आहे.

त्यामुळे शेतकऱ्यांच्या हाता-तोंडाशी आलेला घास हिरावला जात आहे. काढून ठेवलेले सोयाबीनही या पावसामुळे खराब झालेले आहे. परतीचा पाऊस जोरदार बरसत आहे. दरम्यान आता पुन्हा १० ऑक्टोबरपर्यंत पाऊस पडणार असा अंदाज व्यक्त केला जात आहे.

नुकसानीबाबत विमा कंपनीस कळवा

मागील तीन ते चार दिवसांपासून मोठ्या प्रमाणात परतीचा पाऊस बरसत आहे. शेतकऱ्यांनी नुकसानीची माहिती विमा कंपनीकडे तक्रार करून द्यावी, असे आवाहन कृषी विभागाच्या वतीने करण्यात आले आहे.