Nagpur News : महाराष्ट्र पशू व मत्स्य विज्ञान विद्यापीठाचे विस्तार शिक्षण संचालक डॉ. अनिल भिकाने यांना जम्मू येथे व्ही.आय.पी.एम. सोसायटीच्या वतीने फेलोशिप देत सन्मानित करण्यात आले.

पशुवैद्यकीय प्रतिबंधात्मक औषधी सोसायटीच्या राष्ट्रीय परिसंवादाच्या निमित्ताने त्यांचा गौरव झाला. जम्मू येथील राष्ट्रीय परिसंवादाचे उद्घाटन शेर-ए- काश्‍मीर कृषी विज्ञान व तंत्रज्ञान विद्यापीठाचे कुलगुरू डॉ. बी. एन. त्रिपाठी यांच्या हस्ते करण्यात आले.

या वेळी भारतीय पशु वैद्यकीय संशोधन संस्थेचे माजी संचालक डॉ. एम. सी. शर्मा, अधिष्ठाता डॉ. राजेश काटोच, व्हीआयपीएम संस्थेचे सचिव डॉ. अशोक कुमार, संघटन सचिव डॉ. नीलेश शर्मा यांची उपस्थिती होती.

डॉ. भिकाने यांनी माफसू अंतर्गंत उदगीर, लातूर, अकोला व नागपूर येथे विविध पदावर ३४ वर्षे सेवा दिली आहे. माफसूला लोकाभिमूख करण्यात त्यांचा मोठा वाटा आहे. गरजू पशुपालक, शेतकऱ्यांना अहोरात्र सेवा ते देतात.

प्रयोगशाळेच्या चार भिंतीआड न अडकता प्रत्यक्ष गोठ्यावर जात सेवा देणे त्यासोबतच उत्साही व युवा पशुपालकांना मार्गदर्शनातही त्यांनी सातत्या राखले आहे. लंपी नियंत्रणात टास्क फोर्सचे सदस्य म्हणून त्यांनी मोचे योगदान दिले.