Buldana News : डॉ. पंजाबराव देशमुख कृषी विद्यापीठाच्या स्थानिक कृषी विज्ञान केंद्राद्वारे शेतकरी शास्त्रज्ञ मंचाची एप्रिल महिन्याची सभा गुरुवारी (ता. २४) वळती (ता. चिखली ) येथे ‘मामाचं वावर’ या ठिकाणी झाली. =

या सभेला प्रमुख मार्गदर्शक म्हणून पंतप्रधान सूक्ष्म प्रक्रिया उद्योग जिल्हा संसाधन व्यक्ती रवितेज जाधव उपस्थित होते. कृषी विज्ञान केंद्राचे शिक्षण विस्तार विभागाचे विशेषज्ञ डॉ. जगदीश वाडकर, कृषी हवामान तज्ञ मनेश यदुलवार, शेतकरी शास्त्रज्ञ मंचाचे अध्यक्ष विजय भुतेकर व सचिव सर्जेराव पाटील उपस्थित होते.

कृषी विद्यापीठाचे तंत्रज्ञान शेतकऱ्यांच्या शेतापर्यंत पोहोचले पाहिजे व शेतीचा सर्वांगीण विकास झाला पाहिजे या हेतूने कृषी विज्ञान केंद्राद्वारे नोव्हेंबर २०२२ पासून शेतकरी शास्त्रज्ञ मंचाची सभा दर महिन्यात आयोजित केली जाते व शेतकरी-शास्त्रज्ञ यांच्यात सुसंवाद साधला जातो. याचाच एक भाग म्हणून वळती येथील शेतकरी मोहन तेजराव जगताप यांचे कृषी पर्यटन केंद्र ‘मामाचं वावर’ येथे आजची सभा आयोजित करण्यात आली होती.

याप्रसंगी श्री. जाधव शेतकऱ्यांना सूक्ष्म प्रक्रिया उद्योगाची माहिती दिली. हे उद्योग उभारणीसाठीची संपूर्ण प्रक्रिया समजावून सांगितली व या उद्योगासाठी बँकेच्या वित्तसहाय्याबद्दल सखोल मार्गदर्शन केले.

श्री. यदुलवार यांनी आगामी मॉन्सूनचा दीर्घावधी अंदाज शेतकऱ्यांना सांगितला व त्यानुसार पिकाचे योग्य नियोजन करावे असे आवाहन केले. त्यानंतर शेतकरी व शास्त्रज्ञ यांच्यामध्ये भाजीपाला पिकाविषयी साधक बाधक चर्चा झाली. या कार्यक्रमाचे सूत्रसंचालन डॉ. वाडकर यांनी करीत आभार मानले.