Nagar News : ‘‘राज्यात दुधाचे भाव सातत्याने कोसळत असताना, शेतकरी श्रीमंत होणार, शेतकऱ्याला दुधाचे पैसे मिळणार, मार्चअखेर शेतकऱ्यांच्या खात्यावर पैसे जमा होणार, अशी जाहिरातबाजी करून राज्याचे दुग्धविकास तथा महसूलमंत्री राधाकृष्ण विखे पाटील हे शेतकऱ्यांच्या जखमेवर मीठ चोळण्याचा प्रकार करीत आहेत.

शेतकऱ्यांची ही दिशाभूल आहे,’’ असा आरोप किसान सभेचे नेते व दूध उत्पादक संघर्ष समितीचे राज्याचे समन्वयक डॉ. अजित नवले यांनी केला आहे. डॉ. अजित नवले यांनी सांगितले, की राज्यात दुधाचे दर वरचेवर कमी केले जात आहेत.

राज्यातील बहुतांश भागात दुष्काळी परिस्थिती, पाणी, चाराटंचाईमुळे दूध व्यवसाय जपणे जिकिरीचे झाले आहे. दुधाचे दर कमी झाले म्हणून शेतकऱ्यांना प्रति गाईच्या दुधाला पाच रुपये अनुदान देण्याची सरकारने घोषणा केली.

मात्र अटी, शर्ती व ऑनलाइन डेटाच्या जटिलतेमुळे शेतकऱ्यांना अद्यापही अनुदान मिळालेले नाही. अशा पार्श्‍वभूमीवर दुग्धविकासमंत्री राधाकृष्ण विखे पाटील पाच रुपयांच्या न मिळालेल्या अनुदानाच्या जोरावर शेतकरी श्रीमंत होणार असल्याच्या जाहिराती करत असतील तर यापेक्षा अधिक खेदजनक दुसरी कोणतीही गोष्ट असू शकत नाही.

राज्यातले सरकार व दुग्धविकासमंत्र्यांचा अशा जाहिरातीबाबत, असंवेदनशीलतेबाबत तसेच निष्क्रियतेबाबत करावा तेवढा निषेध थोडा आहे. दूध उत्पादक शेतकऱ्यांना आधार द्यायचे सोडून अशा जाहिराती करत शेतकऱ्यांना वेड्यात काढण्याचा प्रकार आहे,’’ असे सांगून नवले यांनी शासन व दुग्धविकासमंत्र्याच्या दूध उत्पादक शेतकऱ्यांच्या प्रति असलेल्या असंवेदनशीलपणाचा निषेध केला आहे.