Chh. Sambhajinagar News : ग्रामविकासाचे मॉडेल समजून घेण्यासह शेती फायद्याची करण्यासाठी शेतकरी वापरत असलेले तंत्रज्ञान जाणून घेण्यासाठी कर्नाटकाच्या बिदर जिल्ह्यातील २७ शेतकरी दोन दिवस मराठवाड्यात आले होते. जो उद्देश घेऊन इकडे आलो होतो, बुधवार (ता.११) परत जाताना शेती बदलासाठी बरीचशी शिदोरी घेऊन जात असल्याची भावना शेतकऱ्यांनी परतत असताना बोलून दाखवली.

कर्नाटकातील बिदर जिल्ह्यातील औराद तालुक्यांतर्गत येत असलेल्या खेर्डा व भंडारकुमटा या दोन गावांतील सुमारे २७ शेतकरी सोमवारी (ता. ९) छत्रपती संभाजीनगर जिल्ह्यात दाखल झाले. अशोक नाईक, गोपाळ पाटील, बालाजी रेड्डी, काशिनाथ स्वामी, अप्पाराव बिरादार, ज्ञानेश्‍वर मुळे आदी शेतकऱ्यांचा यामध्ये समावेश होता.

मंगळवारी (ता. १०) गावांचा विकास नेमका कसा साधता येईल यासाठीचे रोल मॉडेल म्हणून महाराष्ट्रात ओळख असलेल्या छत्रपती संभाजीनगर जिल्ह्यातील पाटोदा या गावाला भेट त्यांनी भेट दिली. भास्कर पेरे पाटील यांची ग्रामविकासाची संकल्पना प्रत्यक्षात कशी अवतरली हे समजून घेतल.

त्यानंतर माळीवडगाव (ता. गंगापूर) येथील गोरखनाथ गोरे या शेतकऱ्याच्या गांडूळ युनिटला भेट देऊन शेतीत गांडूळ खताचे महत्त्व समजून घेतले. गांडूळ खत आणि त्याची होत असलेली निर्यात बघून शेतकरी चकित झाले.

त्यानंतर बुधवारी (ता.११) देवगाव (ता. पैठण) येथील दीपक जोशी यांच्या शेतीला भेट देऊन शून्य मशागत शेतीचे फायदे, तण देई धन ही संकल्पना शेतकऱ्याला कशी अमलात आणता येईल याविषयीची सविस्तर माहिती जाणून घेतली. याच वेळी देवगाव येथील ग्रामपंचायतच्या माध्यमातून झालेल्या विकास कामाची व कार्बन क्रेडिटच्या संकल्पनेची सविस्तर माहिती घेतली.