Jalgaon News : गुलाबी बोंड अळीचा प्रकोप पूर्वहंगामी कापूस पिकात वाढला आहे. बोंडेच उमलत नसल्याची स्थिती आहे. क्षेत्र रिकामे करून पुढे त्यात रब्बी हंगाम साधला जावा, यासाठी शेतकऱ्यांनी क्षेत्र रिकामे करण्यास सुरवात केली आहे.

खानदेशात सुमारे सव्वालाख हेक्टरवर कापसाची लागवड झाली होती. यात जळगाव जिल्ह्यातील लागवड सुमारे ९५ हजार हेक्टरवर झाली होती. या पिकात पहिल्या तीन वेचण्या आटोपल्या आहेत.

पूर्वहंगामी कापसाचे पीक जळगाव जिल्ह्यात चोपडा, जामनेर, यावल, जळगाव, पाचोरा, धुळ्यातील शिरपूर, धुळे, नंदुरबारातील नंदुरबार, शहादा, तळोदा भागात अधिक होते. तापी, गिरणा, अनेर, पांझरा नदीच्या क्षेत्रात दरवर्षी मे अखेरीस किंवा जूनच्या पहिल्या आठवड्यात पूर्वहंगामी कापसाची लागवड केली जाते.

यंदा लागवड किंचित घटली होती. मागील हंगामात सुमारे दीड लाख हेक्टरवर पूर्वहंगामी कापसाची लागवड झाली होती. यंदा ऑक्टोबरमध्ये कापूस वेचणी बऱ्यापैकी पूर्ण झाली आहे.पिकात मागील १० ते १२ दिवसांत गुलाबी बोंड अळीची समस्या आणखी वाढली आहे. यामुळे बोंडेच उमलत नसल्याची स्थिती आहे. गुलाबी बोंड अळीसह बोंडसडची समस्याही आहे.

मका लागवडीकडे कमी कल

काही शेतकरी चारा व धान्यासाठी मका लागवड करीत आहेत. परंतु तुलनेत मका लागवड कमी होईल, असे चित्र खानदेशात सध्या आहे. कारण मक्यास लष्करी अळीचा धोका असतो. खर्चही वाढला आहे. तसेच पाच महिन्याचे हे पीक आहे. पाणी त्यास अधिक लागते. यंदा पाऊसमान कमी आहे. यामुळे मका लागवड कमी होईल, असे शेतकऱ्यांचे म्हणणे आहे.