Washim News : आगामी खरीप हंगामासाठी शेतकऱ्यांना वाढीव पीककर्ज दिले जावे, अशी मागणी तालुक्यातील शेतकऱ्यांकडून केली जात आहे. २०२३-२४ या खरीप हंगामात घेतलेल्या पीक कर्जाचा भरणा ३१ मार्चपूर्वी करावयाचा होता. त्यासाठी अनेकांनी हातउसने पैसे घेत भरणा केला.

या पैशांची परतफेड तसेच हंगामासाठी बी-बियाणे खरेदी, खत निविष्ठा व व्यवस्थापनासाठी शेतकऱ्यांना नवीन हंगामातील पीक कर्जाची प्रतीक्षा लागली आहे. शेतकऱ्यांची खरीप हंगामासाठी पेरणीपूर्व नियोजनाची तयारी सध्या सुरू आहे.

थकीत कर्जाचा भरणा करून कर्ज मिळावे, यासाठी नेहमीप्रमाणे शेतकऱ्यांनी आपल्याकडील थकीत कर्जाचा भरणा केला. त्यासाठी अनेकांना मोठी कसरत करावी लागली.

कर्जाचा भरणा करण्यासाठी जुळवाजुळव म्हणून काहींनी व्याजाने तर काहींनी हातउसने पैसे घेऊन कर्ज भरले. थकीत कर्ज भरल्याने आता सन २०२४-२५ च्या खरीप हंगाम पीक कर्जासाठी शेतकरी पात्र झाले असल्याने लवकरात लवकर कर्ज मिळावे अशी मागणी शेतकऱ्यांकडून केला जात आहे.

 ‘पीककर्जाचे प्रमाण वाढावे’

शेतकऱ्यांच्या शेतीची किंमत अंदाजे १० ते १५ लाख रुपये एकर असताना पीककर्ज प्रती एकरी केवळ २० ते २५ हजार दिले जाते. परंतु बियाणे, खते व औषधांच्या वाढत्या किमतीमुळे मिळालेल्या पीक कर्जात शेतीसाठीचा खर्च भागवणे अवघड झाले आहे.

यंदा नैसर्गिक आपत्तीमुळे शेतकऱ्यांच्या मालाचे मोठ्या प्रमाणावर नुकसान झाले. त्यामुळे शासनाने वाढीव दराने कर्ज देण्याबरोबरच कर्जमाफी करावी, अशी मागणी देखील शेतकऱ्यांतून केली जात आहे.