Onion Rate : राज्यात अवकाळी पावसाने धुमाकूळ घातला आहे. नाशिक जिल्ह्यातही पावसामुळे शेतकऱ्यांचं मोठ्या प्रमाणात नुकसान झालं आहे. त्यामुळे नैसर्गिक आपत्तीने कोलमडलेल्या शेतकऱ्यांना राज्य सरकार तत्काळ मदत करावी, अशी मागणी शेतकरी संघटनेचे सटाणा तालुकाध्यक्ष केशव सूर्यवंशी यांनी केली आहे.

याबाबतच निवेदनही शेतकरी संघटनेनं मंगळवारी (ता.२०) सटाणा तहसीलदारांना दिलं आहे. मागण्या मान्य झाल्या नाही तर मंत्र्यांच्या दरबारी कांदा ओतून आंदोलन केलं जाईल, असा इशाराही शेतकरी संघटनेनं दिला आहे.

राज्य सरकारने कांद्यासाठी भावांतर योजना राबवावी, अशी मागणीही सूर्यवंशी यांनी केली आहे. ते म्हणाले, "गेल्या तीन महिन्यांपासून शेतकऱ्यांना कांद्याचे मातीमोल भाव मिळत असून, सरकारने सरासरी ३००० रुपये दर निश्चित करून भावांतर योजना राबवावी."

अवकाळी पावसामुळं शेतकऱ्यांची कांद्याची रोपे खराब झाळी आहेत. त्यामुळे कांदा लागवड सुमारे एक महिना उशिरा झाली. तसेच मजूर टंचाई, भेसळयुक्त खते, लागवडीचा वाढलेला खर्च, आणि खतांचे वाढते दर या अडचणींना तोंड देत शेतकऱ्यांनी कांदा उत्पादन घेतलं. परंतु काढणीच्या वेळेला आलेल्या अवकाळी पावसानं शेतकऱ्यांच्या हातातोंडाशी आलेला घास हिरावून नेला. ज्या शेतकऱ्यांनी कांदा साठवला, त्यांनाही कवडीमोल दर मिळत असल्याने शेतकरी मोठ्या संकटात सापडला आहे.

मागण्या काय?

- अवकाळी पावसामुळे झालेल्या नुकसानीचे पंचनामे लवकरात लवकर पूर्ण करून तत्काळ आर्थिक मदत जाहीर करावी.

- मागील तीन महिन्यांपासून शेतकऱ्यांकडून स्वस्त दरात कांदा विक्री होत आहे. त्यामुळे सरासरी ३००० रुपये प्रति क्विंटल दर निश्चित करून भावांतर योजना लागू करावी.

- येत्या १ जूनपासून सरकारने ३००० रुपये प्रति क्विंटल दराने कांदा खरेदी सुरू करावी. 

- कांद्याची जास्तीत जास्त निर्यात होण्यासाठी निर्यातदारांना वाहतूक अनुदान द्यावे.

या वेळी संघटनेचे कार्याध्यक्ष भास्कर बागुल, उपाध्यक्ष देविदास अहिरे, युवा आघाडी अध्यक्ष नयन सोनवणे, सरचिटणीस सुनील बिरारी, तसेच सुदर्शन जाधव, विवेक सोनवणे, राकेश अहिरे, त्र्यंबक जाधव, भिका सूर्यवंशी, राजीव सावंत, पोपट अहिरे आदी उपस्थित होते.