Chh. Sambhajinagar News : तालुक्यात प्रस्तावित असलेल्या एमआयडीसी प्रकल्पासाठी जमीन देण्यास शेतकऱ्यांचा विरोध कायम असून, बुधवारी (ता. २८) जिल्हाधिकारी दिलीप स्वामी यांनी यासंदर्भात डोंगरगाव येथे विशेष बैठक घेऊन शेतकऱ्यांशी चर्चा केली.

सिल्लोड तालुक्यातील डोंगरगाव, रजाळवाडी, मंगरूळ व मोढा या चार गावांवर महाराष्ट्र औद्योगिक विकास महामंडळामार्फत नियोजित एमआयडीसीसाठी सातशे हेक्टर जमिनीवर आरक्षण टाकण्यात आले आहे.

चारही गावांच्या महसूल गाव सात-बारा व इतर हक्कामध्ये औद्योगिक वसाहत महामंडळ नाव टाकून बोजा टाकण्यात आलेला आहे. काही महिन्यांपूर्वी या ठिकाणी शासकीय यंत्रणा जमीन मोजणीसाठी आली असताना शेतकऱ्यांनी जमीन मोजणीस विरोध केला होता. याप्रश्नी शेतकरी, नागरिकांशी चर्चा करण्यासाठी जिल्हाधिकारी श्री. स्वामी यांनी विशेष बैठकीचे आयोजन केले होते.

बैठकीत बहुतांश शेतकऱ्यांनी जमीन देण्यास विरोध केला. आम्हाला जमीन द्यायची नसून, आमच्या सात-बारावरील एमआयडीसीचा बोजा तत्काळ कमी करण्यात यावा व शासनाला तसा अहवाल पाठवून एमआयडीसी रद्द करण्यात यावी, अशी मागणी केली.

यासंदर्भात उपस्थितांनी श्री. स्वामी यांना निवेदन दिले. या प्रसंगी उपविभागीय अधिकारी लतिफ पठाण, उपविभागीय पोलिस अधिकारी डॉ. दिनेशकुमार कोल्हे, एमआयडीसीचे प्रादेशिक अधिकारी, चेतन गिरासे यांची उपस्थिती होती.