Latur News : ऑगस्ट व सप्टेंबर महिन्यात दोन्ही जिल्ह्यांत झालेल्या अतिवृष्टीमुळे खरीप हंगामातील पिकांसह फळबागांचे मोठे नुकसान झाले. ३३ टक्क्यांच्या पुढे नुकसान झालेल्या पिके व फळांना सरकारने तातडीने भरपाई मंजूर केली.

जिल्हा प्रशासनाने प्रस्ताव पाठवल्यानंतर अवघ्या चार दिवसांत सरकारने जिल्ह्यातील तीन लाख ५८ हजार ७६७ शेतकऱ्यांना ३८४ कोटी १४ लाखाची भरपाई मंजूर केली. मंजुरीनंतर पंधरा दिवस झाले तरी ही भरपाई शेतकऱ्यांना मिळाली नसल्याने लाडकी बहीण योजनेप्रमाणे भरपाईचा निधीही विधानसभा निवडणुकीच्या कचाट्यात सापडला की काय, असा प्रश्न शेतकऱ्यांना पडला आहे.

भरपाईचे वाटप करण्यासाठी शेतकऱ्यांच्या याद्या ई-पंचनामा पोर्टलवर अपलोड करण्याचे काम सुरू झाले आहे. जिल्ह्यात ऑगस्टमध्ये झालेल्या अतिवृष्टीमुळे पिकांच्या नुकसान भरपाईपोटी ३२६ शेतकऱ्यांना दोन कोटी एक लाख तर सप्टेंबरमधील अतिवृष्टीसाठी तीन लाख ५८ हजार ७६७ शेतकऱ्यांना ३८४ कोटी १४ लाखाची भरपाई सरकारने ४ ऑक्टोबर रोजी मंजूर केली होती.

पूर्वी भरपाईची रक्कम जिल्हाधिकारी कार्यालयाला उपलब्ध व्हायची व जिल्हाधिकारी कार्यालयाकडून तहसीलदारांना निधीचे वाटप केले जायचे. तहसीलदारांकडून संबंधित शेतकऱ्यांच्या खात्यात भरपाईची रक्कम जमा केली जात होती. दोन वर्षांपासून भरपाईचे वाटप करण्यासाठी सरकारने ई-पंचनामा पोर्टल सुरू केले असून त्यावर याद्या अपलोड केल्यानंतर सरकारकडून संबंधित शेतकऱ्यांच्या खात्यावर भरपाईची रक्कम जमा करण्यात येते. भरपाई मंजूर होऊन पंधरा दिवस उलटले तरी ही रक्कम शेतकऱ्यांना अजून मिळालेली नाही.