Solapur News : कृषी विभागाच्या सन २०२३ च्या खरीप हंगामातील कापूस व सोयाबीन उत्पादक शेतक-यांना अर्थसाहाय्य योजनेंतर्गत अर्थसाहाय्य निधी अप्राप्त असलेल्या खातेदारांनी २८ फेब्रुवारी २०२५ पर्यंत आधार संमती व ना हरकत प्रमाणपत्र कृषी विभागाकडे सादर करावे, असे आवाहन जिल्हा अधिक्षक कृषी अधिकारी शुक्राचार्य भोसले यांनी केले आहे.

सन २०२३ या खरीप हंगामातील कापूस व सोयाबीन उत्पादक शेतकऱ्यांना अर्थसाहाय्य देण्यासाठी योजनेअंतर्गत पाच हजार रुपये प्रति हेक्टर प्रमाणे अर्थसाहाय्य कमाल २ हेक्टरच्या मर्यादित देण्यात येत आहे.

यासाठी खरीप २०२३ मध्ये ई-पीक पाहणी केलेले कापूस सोयाबीन उत्पादक शेतकरी, ज्या शेतकऱ्यांनी खरीप २०२३ मध्ये ई. पीक पाहणी पोर्टलवर नोंद केलेली नाही, तथापि ज्यांच्या खरीप २०२३ च्या सातबारा उताऱ्यावर कापूस किंवा सोयाबीन पिकाची नोंद आहे असे खरीप २०२३ कापूस सोयाबीन उत्पादक वैयक्तिक व सामाईक खातेदार पात्र आहेत.

अशा पात्र शेतकऱ्यांनी ई-पीक पाहणी पोर्टलवरील यादीत आपले नाव असलेबाबत खातरजमा www.scagridbt.mahalt.org या पोर्टलवर किया संबंधित कृषी सहाय्यक यांचेकडून करुन घ्यावी तसेच ज्या शेतकऱ्यांनी खरीप २०२३ मध्ये ई - पीक पाहणी पोर्टलवर नोंद केलेली नाही.

तथापि ज्यांच्या खरीप २०२३ च्या सातबारा उताऱ्यावर कापूस किंवा सोयाबीन पिकाची नोंद आहे. अशा शेतक-यांनी आपल्या गावातील संबंधित तलाठी यांचेशी संपर्क साधावा, असे आवाहनही जिल्हा अधीक्षक कृषी अधिकारी भोसले यांनी केले आहे.