Amaravati News : खरीप हंगामाच्या तोंडावर गेल्या दोन महिन्यांत ४२ शेतकऱ्यांनी आत्महत्या केली आहे. यातील बहुतांश आत्महत्या कर्जाचा डोंगर व आर्थिक चणचणीतून झाल्याचे सांगण्यात येत असून जिल्हा प्रशासनाकडून अद्याप या दोन्ही महिन्यांतील प्रकरणांत चौकशी प्रक्रिया पूर्ण झालेली नाही.

जून महिन्यात खरीप हंगामाची सुरुवात झाली असून पेरणीसाठी पैशांची जुळवाजुळव करून तयारी करण्यात शेतकरी व्यग्र होते. गत हंगामात प्रतिकूल हवामानामुळे पिकांचे झालेले नुकसान व हाती आलेल्या पिकांना हमीदरापेक्षाही कमी दर मिळाल्याने शेतकरी आर्थिक विपन्नावस्थेत गेला आहे.

आगामी हंगामासाठी लागणाऱ्या पैशांची तजवीज करताना झालेली दमछाक व बॅंकांसह सावकारांकडून मिळालेला नकार, यामुळे शेतकऱ्यांनी आत्महत्येचा मार्ग स्वीकारला आहे. एप्रिल महिन्यात १७ व मे महिन्यात २५ शेतकऱ्यांनी आत्महत्या केली. यावर्षी जानेवारी ते मे या पाच महिन्यांत जिल्ह्यात ८७ शेतकऱ्यांनी आत्महत्या केली असून एप्रिल व मे महिन्यात हा आलेख मोठ्या प्रमाणावर वाढल्याचे जिल्हा प्रशासनाने दिलेल्या माहितीत उघड झाले आहे.

तथापि एप्रिल व मे महिन्यातील आत्महत्यांच्या प्रकरणांची चौकशी अद्याप प्रलंबित असल्याने कर्जापायी आत्महत्या किती आहेत, हे स्पष्ट झालेले नाही. तथापि जानेवारीत पाच, फेब्रुवारीत दोन व मार्च महिन्यात दोन, अशा नऊ शेतकऱ्यांच्या आत्महत्या शासकीय मदतीसाठी पात्र ठरविण्यात आल्या आहेत.

जानेवारी ते मे या पाच महिन्यांतील ८३ पैकी ७० प्रकरणांची चौकशी प्रलंबित आहे. प्रकरणे प्रलंबित ठेवून जिल्हा प्रशासन वास्तव उघड होणार नाही व केवळ कर्जापायी आत्महत्या झाल्यात, हे लपविण्याचा प्रयत्न करीत असल्याचे दिसून येत आहे.

चार कुटुंबांना मदत

पाच महिन्यांत झालेल्या ८३ पैकी केवळ चार कुटुंबांना शासकीय निकषाप्रमाणे मदत देण्यात आली आहे. जानेवारी महिन्यात पाच तर फेब्रुवारी व मार्चमध्ये प्रत्येकी दोन प्रकरणे शासकीय मदतीसाठी पात्र ठरली आहेत. पाच प्रकरणांत अद्यापही मदत देण्यात आलेली नाही.

जानेवारी ते मे महिन्यातील स्थिती (पात्र)

जानेवारी ः १३ (५),फेब्रुवारी ः १० (२) , मार्च ः १८ (२), एप्रिल ः १७ (०),

मे ः २५ (०)