Kolhapur News : जिल्ह्यातील खुपिरे (ता. करवीर) येथे कृषी विभागाने बनावट खत विक्री प्रकरणी रविवारी (ता. ९) कारवाई केली. रंकभैरवी या कृषी सेवा केंद्रात १०:२६:२६ (एनपीके) या रासायनिक खताच्या ७७ बॅग सापडल्या आहेत.

कृषी केंद्रचालक आकाश गणपती नाळे (रा. सांगरूळ) याच्यावर करवीर पोलिसांत तीन गुन्हे दाखल करण्यात आले आहेत. कृषी विभागाकडून कारवाई दरम्यान १ लाख २५ हजार रुपये किमतीची बनावट खते जप्त करण्यात आली आहेत.

या वेळी कृषी उपसंचालक एन. एस. परीट यांनी दिलेल्या माहितीनुसार, या प्रकरणाची सखोल चौकशी होऊन दोषींवर कडक कारवाई केली जाणार आहे. पोलिस आणि कृषी विभागाकडून मिळालेल्या माहितीनुसार, खुपिरे येथे कोल्हापूर-गगनबावडा मार्गावर आकाश नाळे याचे रंकभैरव नावाने कृषी सेवा केंद्र आहे.

या केंद्रामध्ये अधिकाऱ्यांनी तपासणी सुरू केली. तपासणी दरम्यान पारादीप फॉस्फेट लिमिटेड या खताच्या बॅगमध्ये १०:२६:२६ ऐवजी दुसरे खत भरले असल्याचा संशय आला.

बॅग तपासणी करत असताना ‘प्रिंटिंग मिस्टेक’ असल्याचे लक्षात आले. १०:२६:२६ या खताच्या बॅगचा दर १७२० रुपये आहे. बॅगवर एमआरपी १६५० रुपये होती. यामुळे कृषी अधिकाऱ्यांनी अधिकची चौकशी केली.

चौकशी दरम्यान बनावट व दुसऱ्याच कंपनीचे खत या बॅगमध्ये भरल्याचे अधिकाऱ्यांच्‍या निदर्शनास आले. केंद्र चालकाला जाब विचारला असता ८० बॅग आल्या होत्या. यातील तीन बॅग विकल्या असून ७७ बॅग स्टॉकमध्ये असल्याचे सांगितले.