Washi News : मार्च महिन्याच्या सुरुवातीपासूनच बाजारात हापूस आंब्याची आवक वाढण्यास सुरुवात झाली आहे. त्यापाठोपाठ आता वाशीच्या घाऊक फळ बाजारात कोकणातील हापूससह परराज्यातील इतर जातीच्या आंब्यांनीही गर्दी करण्यास सुरुवात केली आहे.

त्यात कर्नाटकच्य्या आंब्यांची आवक मोठी आहे. हे कर्नाटकचे आंबे घाऊक बाजारात आणि बाजाराबाहेरही रत्नागिरी-देवगड हापूस म्हणून विकले जाऊ लागले आहेत. त्यामुळे अस्सल हापूस खरेदी करताना फसवणूक होण्याची शक्यता वाढली आहे.

बाजारात सध्या कोकणातील हापूसच्य्या सरासरी ८० हजार पेट्या दररोज येत आहेत. सध्या घाऊक बाजारात आंब्याच्या पेटीचा भाव एक हजार रुपयांपासून साडेतीन हजारांपर्यंत आहे.

हा या हंगामातील सर्वाधिक खाली आलेला भाव आहे. दुसरीकडे, बाजारात परराज्यांतून इतर जातींचा आणि कर्नाटकमधूनही आंबा बाजारात येऊ लागला आहे.

कर्नाटकी १०० रुपये किलो

कोकणातील हापूसची चव आजपर्यंत कोणत्याच आंब्यात उतरलेली नाही. यावर्षीही बाजारात हेच चित्र आहे. कर्नाटकचा आंबा सरासरी १०० रुपये किलोने मिळतो; मात्र हापूस म्हणून तो पेटीत पॅक करून, हापूसच्या भावाने विकला जातो. त्यामुळे व्यापाऱ्यांना मोठा नफा मिळतो. यामुळे कर्नाटकच्य्या आंब्याची हापूसच्या नावाने विक्री केली जाते.