Jalgaon News : खानदेशात पाऊस थांबल्याची स्थिती आहे. केळी लागवडदेखील पुढील आठवड्यात गती घेईल. पूर्वमशागतदेखील अनेक हलक्या, मध्यम क्षेत्रांत सुरू झाली आहे. खानदेशात मागील दोन दिवस अपवाद वगळता पाऊस झालेला नाही. अनेक शेतकऱ्यांचे मे मधील पावसात नुकसान झाले आहे. काढणी, मळणीची कामे ठप्प होती. त्यात मागील दोन दिवसांपासून खानदेशात पाऊस नाही.

मागील मंगळवारी (ता.२७) व बुधवारी (ता.२८) खानदेशा अनेक भागात जोरदार पाऊस झाल्याने नुकसान झाले होते. यामुळे शेतकरी चिंतेत होते. अनेकांचा कांदा, मका काढून शेतात मशागत करायची होती. पण पावसामुळे वाफसा नाहीसा झाला होता.

अनेक शेतकरी केळी लागवड टाळत होते. तसेच केळी कंद काढणी व अन्य कामेही ठप्प होती. यामुळे शेतकरी स्वच्छ सूर्यप्रकाशीत वातावरणाची प्रतीक्षा करीत होते. यात खानदेशात गुरुवारी (ता.२९) व शुक्रवारी (ता.३०) अपवाद वगळता पाऊस झाला नाही. तसेच सूर्यप्रकाशात वातावरणदेखील होते.

यामुळे हलक्या व मध्यम क्षेत्रांत वाफसा तयार होण्यास मदत झाली. तसेच शेतकऱ्यांनी सूर्यप्रकाशीत वातावरण लक्षात घेऊन बांधबंदिस्तीची कामेही सुरू केली. पावसाने बंधाऱ्यांचे नुकसानही अनेक भागात झाले. तसेच मातीही वाहून गेल्याचे प्रकार घडले होते. या भागात जेसीबी व मजुरांच्या मदतीने माती टाकण्याचे काम शुक्रवारी अनेक भागात सुरू होते.

सकाळीच सूर्यदर्शन

शनिवारीदेखील (ता.३१) सकाळी सूर्यदर्शन झाले. स्वच्छ व कोरडे वातावरण होते. सुसाट वारा मध्येच येत होता. पावसाचे कुठलेही संकेत सकाळी नसल्याने केळी काढणीसह अन्य कामांना गती मिळाली. तसेच अनेकांनी कापूस लागवडीसाठी पूर्वमशागतीसह अन्य कामेही हाती घेतली. हलक्या, मध्यम जमिनींत ट्रॅक्टरने मशागत सुरू झाली. कारण हलक्या जमिनींत वाफसा दोन दिवसात तयार झाला.

केळी कंद काढणीस गती

मागील दोन दिवसात खानदेशात पाऊस नसल्याने काढणी ९५ ते १०० टक्के झालेल्या केळी बागांत केळी कंद काढायला सुरवात झाली. खानदेशात अनेक शेतकरी जून महिना सुरू झाल्यानंतर केळी कंद काढायला सुरवात करतात. कारण मे अखेरनंतर ऊन कमी होते. जूनमध्ये काहीसे तापमान कमी असते.

ढगाळ वातावरणही अधूनमधून असते. यामुळे केळी लागवड यशस्वी होते. यामुळे केळी कंद काढणीस अनेकांनी सुरवात केली आहे. वाफसा व कोरडे वातावरण असल्याने कंद काढणी सुकर झाली आहे. तीन दिवसांपूर्वी पावसामुळे वाफसा नव्हता. याचा फटका केळी कंद काढणीस बसला होता.