Nashik News : निफाड तालुक्यातील कसबे सुकेणे पंचक्रोशीतील वडाळी नजीक रस्त्यावरील गट क्र. ७५५ मधील वैभव जाधव यांच्या गव्हाच्या शेतात सोमवारी (ता. ३) दुपारी तीनपासून बिबट्या दडून बसला होता.

मंगळवारी (ता. ४) सकाळी साडेनऊपासून दुपारी अडीचपर्यंत बिबट्याला रेस्क्यू करण्याचा थरार जाधव वस्तीवर सुरू होता. ड्रोनद्वारे बिबट्याचा शोध घेतल्यानंतर विशेष म्हणजे वन्यजीव रक्षक शरद जाधव (रा. कसबे सुकेणे) यांनी बिबट्याला जेरबंद केले.

बिबट्या लपून बसल्याने त्याचा शोध घेऊन त्याला जेरबंद करणे अडचणीचे ठरत होते. या पार्श्‍वभूमीवर कृषी उद्योजक प्रवीण रामराव मोगल यांच्या ड्रोन कॅमेऱ्याच्या माध्यमातून या बिबट्याचा शोध घेतल्यानंतर हालचाली समजून घेण्यात आल्या.

त्यानंतर मागोवा घेत निफाड वन विभागाचे वन्यजीव रक्षक शरद जाधव, तसेच कसबे सुकेणे आणि ओझर पोलिसांनी मिळविले. त्यानंतर मंगळवारी (ता. ४) सकाळी साडेनऊपासून बिबट्याला जेरबंद करण्यासाठी रेस्क्यू ऑपरेशन राबविले.

सुरुवातीला वन विभागाचे पथक व स्थानिक शेतकऱ्यांनी जाळीच्या मदतीने बिबट्याला जेरबंद करण्याचा प्रयत्न झाला; मात्र त्यातून बिबट्या निसटला. अखेर तिसऱ्या प्रयत्नात जाधव यांनी बिबट्यावर झेप घेऊन त्यास मानेजवळ पकडले. या दरम्यान वन विभागाने बिबट्याला भुलीचे इंजेक्शन दिले व त्यास सुरक्षित ताब्यात घेतले. हा सर्व थरार तब्बल अडीच तास सुरू होता.

निफाड येथील वनपाल भगवान जाधव, विजय दोंदे, विजय माळी, शरद चांदोरे, वैभव जाधव, राहुल गुंजाळ व पोलिस व स्थानिक शेतकऱ्यांचा या रेस्क्यू ऑपरेशनमध्ये सहभाग होता. वन विभागाने पंचनामा करून त्यास विशेष वाहनाने निफाड येथे नेत त्याची पशुवैद्यकीय अधिकारी यांच्याकडून तपासणी केली. हा मादी बिबट्या असल्याचे समजते.