Pune News : आंतरराष्ट्रीय पातळीवर साउथ आशिया मेट्रोलॉजिकल असोसिएशन (सामा) यांच्यामार्फत एक जानेवारी ते २८ एप्रिल या कालावधीत ‘आंतरराष्ट्रीय हवामानशास्त्र’ या विषयाचे आंतरराष्ट्रीय दर्जाचे प्रशिक्षण घेण्यात आले होते. या प्रशिक्षणाची मे महिन्यात परिक्षा घेण्यात आली.

या परिक्षेचा निकाल मंगळवारी (ता.१९) जाहीर केला आहे. यामध्ये ज्येष्ठ हवामान शास्त्रज्ञ डॉ. रामचंद्र साबळे यांना या परिक्षेत अतिउत्तम दर्जाच्या श्रेणीचे प्रमाणपत्र प्राप्त झाले आहे.

या प्रशिक्षणात जगभरातील सुमारे २ हजार हवामान शास्त्रज्ञांनी भाग घेतला. त्यामध्ये भारतातून डॉ. साबळे यांनीही वयाच्या ७४ व्या वर्षी सहभाग नोंदविला होता. श्री. साबळे यांनी २०२१ मध्ये दक्षिण आशिया खंडातील कृषी हवामान शास्त्रज्ञांचा मंच स्थापन करण्यासाठी पुढाकार घेतला.

हवामान शास्त्रातील लांब पल्ल्याचे पावसाचे अंदाजे देण्याचे राष्ट्रीय पेटंट श्री. साबळे यांना मिळाले आहे. तसेच शेणखत, कंपोष्टखत, प्रेसमड, सिटीकंपोष्ट पासून उत्तम दर्जाचे फॉस्पो मॅन्यूअर बनविण्याच्या शोधाचे राष्ट्रीय पेटंट त्यांच्या नावावर आहे.

कृषी व हवामान शास्त्राचे ते प्रख्यात शास्त्रज्ञ आहेत. ते वृत्तपत्र, चित्रवाहिन्या, रेडिओ, मासिके, व्हॉट्सअॅप ग्रुप द्वारे महाराष्ट्रातील शेतकऱ्यांना माहिती देतात.

स्वयंचलित हवामान केंद्रेही स्थापन

भारतीय हवामानशास्त्र विभागाच्या सहकार्याने त्यांनी ९ कृषी हवामान विभागात हवामान व कृषी सल्ला देणारी केंद्रे सुरू केली. तसेच त्यांच्याद्वारे महाराष्ट्रातील ५२ लाख शेतकऱ्यांना ‘कृषी व हवामान विषयावर’ मोबाईलवर संदेश देण्याचे कार्य सुरू केले.

तसेच महाराष्ट्रातील २०६५ रेव्हेन्यू सर्कलमध्ये सरकारी व खासगी प्रणालीद्वारे स्वयंचलित हवामान केंद्रही त्यांच्या मार्गदर्शनाखाली स्थापन करण्यात आले आहे. हवामानावर आधारित सेंद्रिय शाश्वत शेती प्रणालीची संकल्पना ते शेतकऱ्यांमध्ये रुजवत आहेत.