Chhatrapati Sambhaji Nagar : फळ पिकाचे तज्ज्ञ व गट शेतीचे प्रणेते म्हणून ओळख असलेले डॉ. भगवानराव कापसे यांची राज्यातील चारही विद्यापीठांच्या प्राध्यापक ते संचालक पदापर्यंतच्या निवडीसाठीच्या समितीत नियुक्ती करण्यात आली आहे.

राज्यपाल नियुक्त सदस्य म्हणून डॉ. कापसे तीन वर्षे या निवड समितीत राहतील. राज्यातील चारही कृषी विद्यापीठांमध्ये समन्वय व सुसूत्रता साधण्यासाठी महाराष्ट्र कृषी शिक्षण व संशोधन परिषदेची निर्मिती करण्यात आली आहे.

या परिषदेद्वारे चारही विद्यापीठांतील पदभरती व इतर अनेक विषय समन्वयातून मार्गी लावले जातात. या विद्यापीठांतील प्राध्यापक, विभाग प्रमुख, सहयोगी अधिष्ठाता, अधिष्ठाता संचालक आदी पदांवरील नियुक्तीसाठी एक समिती असते. या समितीमध्ये डॉ. कापसे राज्यपाल नियुक्त सदस्य म्हणून काम पाहतील.

पुढील तीन वर्षांपर्यंत त्यांना या पदावर काम करता येईल. त्यांच्या नियुक्तीने मराठवाड्याच्या शिरपेचात आणखी एक मानाचा तुरा रोवला गेला आहे. डॉ. कापसे यांच्यासह ‘आयसीएआर’चे डॉ. रविशंकर सी. एन. यांचीही राज्यपालांनी या मंडळावर नियुक्ती केली आहे.