Market Committee Jalgaon : महाविकास आघाडीला जळगाव बाजार समितीत सत्ता मिळाली. पण आता सभापतिपद आपल्यालाच प्रथम हवे, यासाठी स्पर्धा वाढली आहे. आघाडीत रस्सीखेच सुरू आहे.

यातच आघाडीचे दोन संचालक ग्रामविकासमंत्री गिरीश महाजन यांना भेटल्याची चर्चा आहे. जळगाव जिल्हा बँकेत सेना (शिंदे गट) व भाजपने बहुमत नसताना राष्ट्रवादी काँग्रेसमध्ये फूट पाडून आपल्या मर्जीतला संचालक अध्यक्षपदी निवडून आणला. हाच पॅटर्न जळगाव बाजार समितीतही आणला जाईल, अशी चर्चा आहे.

येत्या शनिवारी (ता. २०) बाजार समितीत सभापतींची निवड होईल. आघाडीचे ११ संचालक निवडून आले आहेत. तर भाजप - सेनेचे सहा संचालक आहेत. युतीकडे बहुमत नाही.

आघाडीत सभापतिपदासाठी लक्ष्मण पाटील यांच्यासह सुनील महादन, श्यामकांत सोनवणे, मनोज चौधरी यांच्या नावाची चर्चा होती. प्रत्येकाला एक वर्ष सभापतिपद दिले जाईल, असा फॉर्म्यूला आघाडीत चर्चेत होता. त्यात आता आघाडीत फुटीची चर्चा सुरू झाली आहे.

संचालकांना सहलीला नेण्याची तयारी

दोन संचालकांनी मागील आठवड्यात महाजन यांची भेट घेतली. त्यात काय चर्चा झाली हे समजू शकले नाही. परंतु बाजार समितीत सभापती निवडीबाबत ही भेट होती, असा कयास लावला जात आहे. यामुळे आघाडीत खळबळ उडाली आहे. संचालकांना सभापती निवडीपूर्वी एकत्र करून सहलीला परराज्यांत नेण्याची तयारी सुरू असल्याची माहिती मिळाली.