Pune News : ‘‘आदिवासी भागातील शेतकऱ्यांना हिरडा काढताना झाडावरून पडून अपघात होऊ नये, शेतकऱ्यांना संरक्षण मिळावे, या उद्देशाने शाश्‍वत ट्रस्ट आणि टाटा मोटर्स यांच्या आर्थिक सहकार्याने सुरक्षा साधनांचे वितरण केले,’’ अशी माहिती शाश्‍वत ट्रस्टचे अध्यक्ष बुधाजी डामसे यांनी दिली.

आंबेगाव, जुन्नर, खेड, मावळ, भोर तालुक्यांत बाळहिरड्याचे दरवर्षी ८ ते १० हजार टन उत्पादन होते. आदिवासी शेतकरी दरवर्षी एप्रिल व मे महिन्यात हिरडा काढण्याच्या लगबगीत असतात. हिरड्याची झाडे २० ते ३० फूट उंच असतात. त्यामुळे हिरडा काढताना शेतकरी पडून गंभीर जखमी होण्याबरोबरच मृत्युमुखी पडल्याच्या घटना घडतात. या घटना टाळण्यासाठी सुरक्षा पट्ट्यांचे वितरण करण्यात आले आहे.

टाटा मोटर्सचे रोहित सरोज, सामाजिक दायित्व निधी प्रमुख लित्तेश आत्तरडे यांनी या विषयाचा गांभीर्याने विचार करत आंबेगाव तालुक्यातील कोंढरे, असाणे येथे जाऊन शेतकऱ्यांना सुरक्षा पट्ट्यांचा वापर कसा करायचा याबाबतचे प्रशिक्षण देऊन कोंढरे, कुशिरे, भोईरवाडी,

काळवाडी, पंचाळे, माळीण, मेनुंबरवाडी, अडिवरे, असाणे, न्हावेड आदी गावांमधील २५० कुटुंबांना त्यांचे वितरण केले. या प्रसंगी नारायण भोकटे, विजय चिमटे, शंकर धराडे, पुष्पा शेळके, किसन मोरे, प्रवीण जढर, शंकर भोईर आदी शेतकरी उपस्थित होते.