Pune News: ‘मुख्यमंत्री माझी लाडकी बहीण’ योजनेंतर्गत सध्या राज्यातील २ कोटी ३४ लाख महिलांना दरमहा १,५०० रुपये आर्थिक सहाय्य दिले जात आहे. तर १४ महिलांना केवळ ५०० रुपयेच दिले जात आहेत. यामुळे अनेक लाभार्थींमध्ये माझ्या खात्यात पूर्ण रक्कम का जमा होत नाही?, "शिल्लक रक्कम कुठे जाते?" अशा प्रश्नांची संभ्रमित अवस्था निर्माण झाली आहे. याविषयी सरकारने स्पष्टीकरण दिले आहे.

या योजनेतून महिलांना दरमहा आर्थिक सहाय्य दिले जाते. मात्र ज्या महिलांना आधीच इतर सरकारी योजनांमधून नियमित आर्थिक मदत मिळते, अशा महिलांना ‘लाडकी बहीण’ योजनेतून संपूर्ण रक्कम मिळत नाही. त्यामुळे काही लाभार्थींना योजनेतील रक्कम कमी प्रमाणात दिली जाते.

शासनाचा उद्देश असा आहे की, प्रत्येक पात्र महिलेला एकूण १,५०० रुपयांपेक्षा अधिक रक्कम मिळू नये आणि एका योजनेतून किंवा एकत्रितपणे इतकीच मदत मिळावी. त्यामुळे जर एखाद्या महिलेला दुसऱ्या योजनेतून निधी मिळत असेल, तर ‘माझी लाडकी बहीण’ योजनेतून त्या प्रमाणात रक्कम वजा करून दिली जाते.

उदाहरणार्थ,

ज्या महिलांना ‘संजय गांधी निराधार अनुदान योजना’ अंतर्गत आधीच १,५०० रुपये मिळतात, त्यांना ‘लाडकी बहीण’ योजनेतून कोणताही लाभ मिळत नाही.

तर ज्या महिलांना ‘नमो शेतकरी सन्मान निधी’ योजनेतून दरमहा १,००० रुपये मिळतात, त्यांना ‘लाडकी बहीण’ योजनेतून उर्वरित फक्त ५०० रुपयेच दिले जातात.

सरकारचा स्पष्ट नियम असा आहे की, कोणत्याही महिलेला वेगवेगळ्या योजनांमधून मिळणारी एकूण आर्थिक मदत १,५०० रुपयांपेक्षा जास्त असू नये. त्यामुळे महिलांनी अर्ज करताना इतर योजनांचा लाभ घेत असल्यास, त्यानुसार ‘लाडकी बहीण’ योजनेतील रक्कम कमी होते किंवा दिली जात नाही. या नियमानुसार काही महिलांमध्ये संभ्रम निर्माण झाला असला, तरी शासनाने पारदर्शकतेसाठी ही व्यवस्था लागू केली आहे. फक्त पात्र आणि गरजू महिलांनाच योग्य प्रमाणात लाभ मिळावा, हा शासनाचा मुख्य उद्देश आहे.