Ahilyanagar News : जिल्हाधिकारी कार्यालयात महसूल विभागाअंतर्गत येणाऱ्या अपील प्रकरणांवर ई-सुनावणी (ऑनलाईन) प्रक्रियेला अहिल्यानगर येथे प्रारंभ करण्यात आला आहे. या माध्यमातून जमीन व मालमत्तेशी संबंधित वाद, हक्क नोंदणी, फेरफार, उताऱ्यावरील दुरुस्ती, तसेच मालकी हक्काच्या प्रकरणांवर आता ऑनलाइन पद्धतीने सुनावणी होणार आहे.

या मोहिमेमुळे महसूलकडील प्रश्न सुटण्याला मदत होईल असे जिल्हाधिकारी डॉ. पंकज आशिया यांनी सांगितले. महसूल विभागाकडे जमीन, मालमत्ता व इतर अनेक प्रश्न दाखल झालेले असतात. त्याचा निपटारा करण्यासाठी सुनावणी घेताना सबंधितांना येथे यावे लागत असल्याने अनेक त्रासाला सामोरे जावे लागते. आता बऱ्याच बाबी ऑनलाईन झाल्या आहेत.

त्यामुळे महसुलकडील प्रश्न सोडवण्यासाठी ऑनलाईन सुविधा उपलब्ध करून दिली आहे. अहिल्यानगर येथे अपर जिल्हाधिकारी बाळासाहेब कोळेकर यांच्या दालनात ई-सुनावणीला प्रारंभ करण्यात आला. जिल्हाधिकारी डॉ. आशिया म्हणाले की, शासनाकडून संपूर्ण महसूल व्यवस्थेला डिजिटायझेशनच्या दिशेने सुरू आहे. ‘पेपरलेस व पारदर्शक प्रशासन’ देण्याचा प्रयत्न केला जात आहे.

ई-सुनावणी ही नवीन संकल्पना सामान्य नागरिकांसाठी हितकारक आहे. यातून महसूल प्रकरणांवरील निर्णय जलदगतीने होऊन कामकाजात अधिक आणि सुसूत्रता येईल. येत्या काळात तालुका कार्यालयांमध्येही ही सेवा कार्यान्वित करण्यात येणार आहे. नागरिकांना त्यांच्या घरी बसूनच न्याय मिळवण्याचा मार्ग मोकळा होणार आहे.

ई-सुनावणीमुळे महसूल विभागातील प्रलंबित प्रकरणांची संख्या कमी होण्यास मदत होणार आहे. अपर जिल्हाधिकारी कोळेकर म्हणाले की, आता पक्षकारांना, तसेच विधिज्ञांना जिल्हाधिकारी कार्यालयात वारंवार येण्याची गरज नाही.

ई-सुनावणी व्हिडिओ कॉन्फरन्सिंगद्वारे घेतली जाणार असल्याने घरबसल्या आपले म्हणणे मांडता येईल. यामुळे वेळ, प्रवासाचा खर्च व श्रम वाचण्यास मोठी मदत होणार आहे. शिवाय पारदर्शकपणे आणि वेळेत निर्णय देणे यामुळे शक्य होणार आहे.