New Delhi News : भारत सरकारने कृषी व शेतकरी कल्याण मंत्रालयात कृषी सचिव म्हणून वरिष्ठ सनदी अधिकारी देवेश चतुर्वेदी यांची नियुक्ती केली आहे. चतुर्वेदी हे उत्तर प्रदेश कॅडरचे सनदी अधिकारी आहेत.

भारतीय प्रशासकीय सेवेत ते १९८९ च्या बॅचचे अधिकारी आहेत. सध्या ते उत्तर प्रदेश सरकारमध्ये कृषी उत्पादन आयुक्त म्हणून कार्यरत आहेत. याआधी, त्यांनी उत्तर प्रदेश सरकारमध्ये विविध महत्त्वाच्या पदांवर काम केले आहे.

देवेश चतुर्वेदी यांनी लखनऊ, बुलंदशहर, कानपूर, गोरखपूर आणि मुरादाबाद या जिल्ह्यांमध्ये जिल्हा दंडाधिकारी म्हणून काम केले आहे.

त्यांनी कृषी शिक्षण आणि संशोधन विभाग आणि कृषी विपणन विभाग, कृषी विदेश व्यापार आणि निर्यात प्रोत्साहन ही पदेही भूषविली आहेत. त्यांची कृषी विभागातील सखोल माहिती आणि अनुभव लक्षात घेऊन भारत सरकारने त्यांची या महत्त्वाच्या पदावर नियुक्ती केली आहे.

चतुर्वेदी यांनी उत्तर प्रदेशमध्ये कृषी विकास व कृषी व्यापार वाढविण्यात महत्त्वाची भूमिका बजावली आहे. त्यांच्या नियुक्तीने कृषी क्षेत्रात नवी दिशा आणि सुधारणा होण्याची आशा आहे.