Pune News : हिरडा नुकसान भरपाई मिळावी, अशी मागणी किसान सभेचे डॉ. अतुल चौधरी यांनी राज्याचे मदत व पुनर्वसनमंत्री अनिल पाटील यांची अमळनेर (जि. जळगाव) येथे भेट घेऊन केली.

या वेळी मंत्री अनिल पाटील यांनी सकारात्मक प्रतिसाद देऊन या प्रश्नांच्या सोडवणुकीसाठी आवश्यक ते सहकार्य करू, असे आश्वासन दिले. या वेळी डॉ. प्रशांत देवरे, व डॉ. दिनेश पाटील आदी उपस्थित होते.

राज्यात जून २०२० च्या पहिल्या आठवड्यात झालेल्या निसर्ग चक्रीवादळामुळे शेती पिकांचे फळबागांचे तसेच घरे व इतर घरगुती साहित्यांचे मोठे नुकसान झालेले होते. विशेषत: पुणे जिल्ह्यातील जुन्नर,आंबेगाव या तालुक्यांतील शेतकऱ्यांना मोठा फटका बसलेला होता. याबरोबरच या तालुक्यातील आदिवासी समाजाचे मुख्य उत्पनाचे साधन असलेल्या बाळहिरडा या औषधी फळाचेही या वेळी मोठ्या प्रमाणात नुकसान झाले होते.

या नुकसानीचे पंचनामे प्रशासनाच्या वतीने करण्यात आले होते व नुकसान भरपाईविषयी अहवाल राज्य शासनाला सादर करण्यात आला होता. ही नुकसान भरपाई मिळावी, यासाठी किसान सभेच्या वतीने सातत्यपूर्ण जनआंदोलन व प्रश्नाचा पाठपुरावा सुरू आहे.

नुकतेच १९ ऑक्टोबर २०२३ रोजी मंत्रालय, मुंबई येथे आदिवासी विकास मंत्री डॉ. विजयकुमार गावीत यांच्या अध्यक्षतेखाली बैठक आदिवासी विकास विभागात पार पडली. या वेळी राज्याचे सहकारमंत्री दिलीप वळसे पाटील व मदत, पुनर्वसन विभागाचे मंत्री अनिल पाटील आदी उपस्थित होते.

हिरडा नुकसानभरपाई देण्यासाठी प्रयत्न करणार असे तीनही कॅबिनेट मंत्री यांनी संघटनेच्या शिष्टमंडळास आश्वासित केले होते. परंतु ही नुकसानभरपाई अद्याप मिळाली नाही. या पार्श्‍वभूमीवर मदत व पुनर्वसन मंत्री अनिल पाटील यांची त्यांच्या मतदार संघात म्हणजेच अमळनेर येथे किसान सभेच्या सदस्यांनी भेट घेऊन हिरडा नुकसानभरपाई आदिवासी भागातील शेतकऱ्यांना मिळण्याची विनंती करण्यात आली.