Poladpur News : बदलत्या काळानुसार बांबूचे सूप, टोपल्या कालबाह्य झाल्‍या असल्‍या तरी सण-उत्सवात त्‍यांना आवर्जून मागणी असते. गौरी पूजनासाठी कोकणात ओवसा महत्त्वाचा असतो. यंदा मूळ नक्षत्र असल्याने औवसा साजरा करण्यात येणार आहे,

त्‍यासाठी तालुक्‍यात हजारो सुपांची विक्रीतून मोठी उलाढाल होत असल्‍याने बुरूड व्यावसायिकांना गणेशोत्‍सवानिमित्त सुगीचे दिवस आले आहेत. घाटमाथ्यावरील सूपविक्रेते कोकणात दाखल झाले असून १५० ते २०० रुपये दराने विक्री होत आहे.

गणरायाच्या आगमनानंतर मंगळवारी (ता. १०) ज्‍येष्ठागौरी आवाहन आहे. महाडसह पोलादपूर बाजारपेठेत पूजा साहित्‍यासह फळा-फुलांच्या खरेदीसाठी गर्दी होत आहे. महाड, पोलादपूरमधील बुरूड व्यावसायिकांनी हजारो सुपे बनवली असून १६ बंदी सुपांना मोठ्या प्रमाणात मागणी आहे. यंदा एक सूप २०० ते २५० रुपये तर लहान सुपे १०० ते १५० रुपयांना विकले जात आहे.

पोलादपूरमध्ये ५३० तर महाडमध्ये १,३०० पेक्षा जास्त गौरींचे आगमन व पूजन करण्यात येणार आहे. आतापर्यंत दीड हजारापेक्षा जास्‍त सुपांची विक्री झाल्‍याचे व्यावसायिकांकडून सांगण्यात येत आहे.