Jalgaon News : खानदेशात या आठवड्यात काही भागात पाऊस झाला. परंतु पेरणीयोग्य पाऊस या महिन्यात अपवाद वगळता झालेला नाही. यामुळे कोरडवाहू पिकांच्या पेरण्या रखडत सुरू आहेत. काही शेतकरी उडीद, कोरडवाहू कापूस, तूर आदींची लागवड करीत आहेत. परंतु सोयाबीन, मूग आदींची पेऱणी कुठेही झालेली नाही.

फक्त पूर्वहंगामी किंवा बागायती कापसाची लागवड खानदेशात झाली आहे. पेरणीयोग्य पाऊस अपवाद वगळता या महिन्यात झालेला नाही. दुसरीकडे पेरणीयोग्य पाऊस झाल्याशिवाय पेऱणी करू नका, असे आवाहन कृषी विभाग करीत आहे.

यातच बियाणे महाग आहे. यामुळे पेरणी शेतकरी टाळत आहेत. खानदेशात मे महिन्यात ६ मे नंतर अनेक दिवस वादळी पाऊस, गारपीट झाली. यात पिकांची हानी झाली. जून महिना सुरू होतानाच पाऊस नव्हता. या आठवड्यात किंवा ११ जूनपासून काही भागात पावसाने हजेरी लावली आहे. त्यातही वादळी पावसाने एरंडोल, जामनेर, जळगाव, चोपडा, यावल आदी भागांत केळी व अन्य पिकांचे नुकसान केले आहे.

केळीसह अन्य पिकांच्या हानीचे पुन्हा पंचनामे खानदेशात सुरू झाले आहेत. ४० मिलीमीटर किंवा त्यापेक्षा अधिकचा पाऊस झालेला नाही. यामुळे पेरणीची कामे सुरू असल्याचे दिसत नाही. पण काही शेतकरी पाऊस आल्यानंतर धावपळ होवू नये यासाठी सध्या उडीद, तूर, कोरडवाहू कापसाची पेरणी, लागवड करीत आहेत.

ही लागवड फारशी सुरू नाही. खानदेशात १४ लाख हेक्टरवर खरिपातील पिकांची पेरणी होईल. यातील आठ ते १० टक्के क्षेत्र नापेर राहील. पेरणी या आठवड्यात सुरू होईल, अशी अपेक्षा होती.

परंतु पुरेसा पाऊस नसल्याने पेरणी सुरू झालेली नाही. खानदेशात सुमारे अडीच लाख हेक्टरवर बागायती कापसाची लागवड झाली आहे. तर सुमारे एक ते सव्वा लाख हेक्टरवर कोरडवाहू पिकांची पेरणी झाली आहे. धूळ पेरणीदेखील अल्पच होती. यामुळे पेरणीची टक्केवारी ४० पर्यंतदेखील नाही.

अद्यापही पेरण्या आटोपल्या नाहीत

मागील हंगामात ९ जूननंतर पेरणीला गती आली होती. परंतु यंदा जून महिना अर्धाअधिक संपलेला असतानादेखील पेरण्या आटोपलेल्या नाहीत. पुढील आठवड्यात चांगला पाऊस झाल्यास पेरण्यांना गती येईल. तसेच सध्या अनेक शेतकरी पूर्वमशागत, मशागत करीत आहेत. पेरणीसाठी शेती तयार नसल्यानेदेखील अनेक जण पेरणी करू शकलेले नाहीत.