Parbhani News : परभणी जिल्ह्यात १ एप्रिल ते २९ एप्रिल या कालावधीत झालेला वादळी पाऊस, गारपिटीमुळे सेलू, पूर्णा, गंगाखेड या ३ तालुक्यांतील ५ हजार ५६६ हेक्टरवर पिकांना फटका बसला आहे.

त्यात एकट्या पूर्णा तालुक्यातील १३ गावांतील ६ हजार ६५३ शेतकऱ्यांच्या ५ हजार ४१५ हेक्टरवरील पिकांचे नुकसान झाले आहे, अशी माहिती महसूल विभागाच्या सूत्रांनी दिली.

तीन तालुक्यांत एकूण सहा हजार ८३४ शेतकऱ्यांच्या जिरायती, बागायती, फळपिकांचे नुकसान झाल्याचा प्राथमिक अंदाज आहे. तसेच वीज कोसळून ३ व्यक्तींचा मृत्यू झाला. ५७ जनावरे दगावली.

एप्रिलमधील वादळी पावसाचा फटका जिल्ह्यातील ३८ गावांतील शेतकरी तसेच पशुपालकांना बसला आहे. पूर्णा तालुक्यातील १३ गावांतील ६ हजार ६५३ शेतकऱ्यांच्या ५ हजार ४१५ हेक्टरवरील पिकांचे नुकसान झाले.

त्यात बागायती पिकांचे क्षेत्र ५ हजार २९० हेक्टर, फळपिकांचे क्षेत्र १२५ हेक्टर आहे. सेलू तालुक्यातील ६ गावांतील १८० शेतकऱ्यांचे १५० हेक्टर क्षेत्र बाधित आहे.

त्यात जिरायती पिकांचे क्षेत्र ३७ हेक्टर, बागायती क्षेत्र ८१ हेक्टर, फळपिकांचे क्षेत्र ३२ हेक्टर आहे. गंगाखेड तालुक्यातील १ हेक्टर क्षेत्र बाधित आहे.

वीज पडून मानवत, पूर्णा, जिंतूर तालुक्यात प्रत्येकी एक अशा एकूण ३ व्यक्तींचा मृत्यू झाला. तर परभणी तालुक्यात २, सेलू तालुक्यात १, जिंतूर तालुक्यात ४०, मानवत तालुक्यात २ अशी एकूण ४५ जनावरे दगावली आहेत.

ओढकाम करणारी ८ जनावरे दगावली. त्यात परभणी, जिंतूर, पाथरी तालुक्यांतील प्रत्येकी १, सेलू तालुक्यातील ३ आणि गंगाखेड तालुक्यातील २ जनावरांचा समावेश आहे. परभणी तालुक्यातील १, मानवत तालुक्यातील २, सोनपेठ तालुक्यांतील ३ असे मिळून एकूण ७ घरांची अंशतः पडझड झाली आहे.