Kolhapur News : राजगोळी खुर्द (ता. चंदगड) येथील ओलम (हेमरस) साखर कारखान्याच्या गळीत हंगामाचा प्रारंभ झाला. शनिवारपासून तोडणी व वाहतूक यंत्रणा कामाला लागली आहे.

ऊस गाळपाला प्रत्यक्षात सुरुवात झाल्याने स्थानिक वाहतूक व तोडणी मजुरांनी ऊस तोडणीला सुरुवात करावी, असे आवाहन कारखान्याचे बिझनेस हेड भरत कुंडल यांनी करून कारखान्याची गाळप क्षमता वाढवल्याने बस पाळीचा प्रश्न सुटणार असल्याचे सांगितले.

कारखान्याच्या गळीत हंगामाचे मोळी पूजन ७ नोव्हेंबरला झाले. चंदगड, आजरा व गडहिंग्लज तालुक्यांतील कारखान्यांच्या शेती कार्यालयातील कर्मचारी शेतकरी व ऊस तोडणी मजुरांच्या भेटी घेऊन ऊस तोडणीसाठी आग्रह करत आहेत.

शनिवारपासून ३० टक्के प्रत्यक्ष ऊस तोडणीची यंत्रणा कामाला लावली आहे. भात सुगीच्या हंगामात ऊस तोडणी मजूर गुंतल्याने पूर्ण क्षमतेने तोडणी यंत्रणा सुरू करण्यात करखाना प्रशासनाला अडचणी येत आहेत.

यावर्षी नोव्हेंबरपर्यंत परतीचा पाऊस झाल्याने अजूनही शेतातून पाणी आहे. त्यामुळे रस्त्याकडील व माळरानावरील ऊस तोडणीच्या कामाला सुरुवात झाल्याचे कुंडल यांनी सांगितले.

गडहिंग्लज विभागातील सर्वच शेती कार्यालयांतून कर्मचाऱ्यांनी स्थानिक तोडणी मजुरांना व वाहतूकदारांना ऊस तोडणीच्या सूचना दिल्या आहेत. सध्या बीडच्या ऊस टोळ्यांवर कारखाना सुरू आहे. स्थानिक ऊस टोळ्यांनीही लवकरात लवकर कामाला लागावे.