Solapur News : लांबोटी (ता. मोहोळ) येथील वीजवितरण कंपनी अभियंत्याच्या दुर्लक्षामुळे अन् सतत खंडित होणाऱ्या वीज पुरवठ्यामुळे खुनेश्वर, हिंगणी (निपाणी) व भांबेवाडी शिवारातील सहाशे एकराहून अधिक क्षेत्रावरील पिके जळू लागली आहेत.

याबाबत लांबोटी येथील अभियंता शरद मारकड यांच्याशी यांनी संपर्क करण्याचे टाळले. खुनेश्वर, भांबेवाडी व हिंगणी (निपाणी) या गावांना लांबोटी व भांबेवाडी येथील सबस्टेशन मधून विद्युत पुरवठा केला जातो. सध्या उन्हाची तीव्रता दिवसेंदिवस वाढत असल्यामुळे जमिनीतील ओल कमी होत आहे.

त्यामुळे पिकांना पाण्याची नितांत गरज आहे. परंतु सतत खंडित होणाऱ्या वीज पुरवठ्यामुळे विद्युत पंप चालू केल्यास पिकांत पाणी पोहोचेपर्यंत लाइट गायब होते. त्यामुळे पिके पाण्याअभावी जळत आहेत. परिणामी शेतकऱ्यांचे पाण्याअभावी मोठ्याप्रमाणात नुकसान होत आहे.यंदा समाधानकारक पाऊस झाल्यामुळे बोअर व विहिरींना चांगले पाणी आहे.

परंतु वीजपुरवठा बंद असल्यामुळे विद्युतपंप बंद आहेत. वस्तीवरील जनावरांना पिण्यासाठी पाणी मिळणे कठीण झाले आहे. शेतीपूरक दुग्ध व्यवसायाला आर्थिक फटका सहन करावा लागत आहे. लांबोटी येथील सबस्टेशनमध्ये नवीन रोहित्र बसविल्यामुळे विद्युत पुरवठा क्षमता वाढली आहे.

खुनेश्वर शिवारातील काही भाग लांबोटी सबस्टेशनला जोडावा व हिंगणी शिवारातील नरखेड सबस्टेशनला जोडल्यास विद्युत पुरवठा सुरळीत होईल, अशी मागणी शेतकरी करीत आहेत.